Shefi i Politikës së Jashtme të Bashkimit Evropian, Josep Borrell, u ka thënë Kosovës dhe Serbisë se progresi për anëtarësim në BE dhe ai në dialog duhet të shkojnë dorë për dore.
Borell shpreson që marrëveshja bazë e Brukselit e cila siç ka thënë nuk ishte e lehtë për tu arritur të zbatohet nga dyja shtetet dhe kështu sipas tij të ecet përpara drejt anëtarësimit në Bashkimin Evropian.
“Në Kosovë dhe Serbi më lejoni të përmend punën që jemi duke bërë në dialog, më besoni shumë punë. Kemi zgjidhur çështjen e targave me marrëveshje reciproke, kemi pasur sukses në politikën për pranim të dokumenteve më në fund, duke ua mundësuar qytetarëve të Kosovës dhe të Serbisë të lëvizin pa pengesa nga njëra anë e kufirit në tjetrën. Është arritje e rëndësishme, nuk ishte e lehtë. I dhamë fund pas 20 vjetëve shpenzimit të parregullt të energjisë elektrike në veri. Dhe arritëm marrëveshjen bazë në Brukel dhe aneksin në Ohër. Fatkeqësisht, zbatimi është në pritje. Dhe për të dyja, progresi për anëtarësim në BE dhe ai në dialog duhet të shkojnë dorë për dore. Jo njërën po, njërën jo. Kjo ka nevojë për përpjekje dhe punë të palodhshme dhe shpresoj që kjo marrëveshje, që nuk ishte e lehtë për t’u arritur, të zbatohet dhe të ecet përpara drejt normalizimit dhe anëtarësimit në BE”, ka thënë ai gjatë një konferencë për shtyp të mërkurën
Po ashtu ai ka thënë se zgjerimi do të jetë në krye të agjendës së Komisionit Evropian, duke e cilësuar KE-në si magnet.
“Janë nëntë kandidate dhe një potencial – dyfish më shumë se sa ishin në vitin 2019. Tregon se Komisioni Evropian vepron si magnet, atraktiv për njerëzit dhe shtetet. Integrimi gradual ka avancuar dhe qytetarët e shteteve që duan të anëtarësohen kanë përfituar tashmë. Nuk kanë nevojë të presin deri në fund dhe pastaj t’i kenë të gjitha. Është proces. Dhe gjatë procesit, përfitimet janë të prekshme dhe qytetarët i marrin ditë për ditë – kjo përfshin udhëtimin pa viza të Ballkanit Perëndimor nëpër shtetet e BE-së dhe kemi prezantuar Planin e Rritjes për shtetet e Ballkanit Perëndimor, Moldavinë e Ukrainën, ku sundimi i ligjit është në qendër”, ka shtuar ai./teve1.info/
