Bordi i Paqes ka përshëndetur vendimin e Qeverisë së Kosovës për dërgimin e trupave të Forcës së Sigurisë së Kosovës në Gazë, duke e konsideruar këtë një hap pozitiv për paqen dhe rindërtimin e zonës.
Në një postim në rrjetin social X, Bordi i Paqes theksoi mbështetjen për vendimin e institucioneve të Kosovës.
Kryeministri Albin Kurti tha se Kosova është e gatshme të ndihmojë popullin e Gazës, duke përmendur përvojën e vendit me misionet ndërkombëtare që nga viti 1999.
“Bordi i Paqes e mirëpret angazhimin e fuqishëm të Qeverisë së Kosovës për të avancuar paqen dhe rindërtimin në Gazë”, thuhet në reagim.
Kosovo is sending a KSF contingent to an international stabilization mission in Gaza.
Defense Minister @EjupMaqedonci emphasizes focus on security, civilian protection, and humanitarian support, highlighting Kosovo’s growing role in international peace and security. pic.twitter.com/JHkRTV4nae— RTK – Radio and Television of Kosovo (@rtklivecom) March 30, 2026
Ministri i Mbrojtjes, Ejup Maqedonci, shtoi se ky hap forcon profilin ndërkombëtar të Kosovës dhe tregon gatishmërinë e FSK-së për të kontribuar në stabilitet global.
“Ky vendim forcon edhe më tej profilin ndërkombëtar të shtetit tonë, afirmon profesionalizmin e FSK-së dhe e vendos republikën tonë në radhën e shteteve që jo vetëm përfitojnë nga siguria ndërkombëtare, por edhe kontribuojnë vazhdimisht në ruajtjen e paqes dhe rendit ndërkombëtar”, tha ai.
Ndryshe, vendimi u miratua njëzëri dhe dërgimi i trupave pritet të bëhet përmes Forcës Ndërkombëtare Stabilizuese, pjesë e iniciativës së Bordit të Paqes.
Kosova është një nga pesë vendet e para që kanë konfirmuar pjesëmarrjen, së bashku me Indonezinë, Marokun, Kazakistanin dhe Shqipërinë.
Numri i trupave dhe data e dislokimit nuk janë konfirmuar ende, por fillimisht planifikohet dërgimi i rreth 20 ushtarëve të specializuar, duke përfshirë ekipe për deminim, operacione speciale dhe shërbime mjekësore.
FSK-ja ka marrë pjesë më parë në misione ndërkombëtare, si në Kuvajt (2021) dhe në Ishujt Falkland (2022), dhe aktualisht është në proces shndërrimi në ushtri të plotë, që pritet të përfundojë deri në vitin 2028.
Në të njëjtën mbledhje, Qeveria miratoi edhe ndarjen e një shpërblimi për Federatën e Futbollit të Kosovës dhe pagesën e pagës së 13-të për rreth 91.2 mijë punonjës në sektorin publik.
