Bora dhe KEK-u, do të përballen në fazën e play-outit, që është e vlefshme për skuadrën që do të jetë pjesë e Superligës së Kosovës në basketboll për sezonin e ardhshëm. Këto dy skuadra do ti luajnë dy ndeshje, ku e para do të luhet sot prej orës 19:00 në palestrën “Adem Jashari” në Obiliq.
Bora këtë sezon ka debutuar në elitën e basketbollit kosovar duke përfunduar e parafundit në stinorin e rregullt, ndërsa KEK-u ka arritur deri në finalen e play-offit të Ligës së Parë ku është mposhtur nga skuadra e Grapelandit.
Bazuar në cilësinë e skuadrave, Bora vlerësohet favorite duke pasur parasysh se në 28 ndeshje të luajtura në elitën e basketbollit kosovar ka regjistruar 9 fitore karshi 19 humbjeve.
Përballja e dytë ndërmjet këtyre dy skuadrave, do të luhet këtë javë por në palestrën “1 Tetori” në Prishtinë, ku Bora ka luajtur ndeshjet si vendas.
