Kur Kosova dhe Zvicra zbresin në fushë këtë të premte për nisjen e kualifikueseve të Kampionatit Botëror, nuk është thjesht një ndeshje futbolli. Është një përballje me shumë histori, lidhje kulturore e familjare, dhe sidomos me shumë lojtarë që njohin mirë të dyja anët e barazhit, nis shkrimin gazeta e njohur zvicerane |Blick”.
Rreth 200 mijë persona me prejardhje nga Kosova jetojnë në Zvicër, dhe shumë prej tyre janë rritur me ëndrrën për t’u bërë futbollistë. Disa e kanë veshur fanellën e Zvicrës me krenari, si Granit Xhaka (32) dhe Xherdan Shaqiri (33), që për më shumë se një dekadë kanë qenë fytyra të kombëtares helvetike. Por sot, një brez i ri futbollistësh me rrënjë në Kosovë po zgjedh të përfaqësojë vendin e origjinës.
Avdullahu dhe Hodza – zemra e mesfushës me rrënjë në Zvicër
Në krye të kësaj vale të re që përfaqëson Kosovën janë Leon Avdullahu (21) dhe Veldin Hodza (22). Avdullahu, i lindur dhe rritur në Zvicër, së fundmi zgjodhi të përfaqësojë Kosovën, një vendim që trajneri austriak i “Dardanëve”, Franco Foda (59), e përshëndeti me entuziazëm:
“Jam shumë i lumtur që gjithnjë e më shumë lojtarë po zgjedhin Kosovën. Kjo tregon se ata shohin zhvillimin e skuadrës në vitet e fundit.”
Avdullahu dhe Hodza, i cili hoqi dorë nga mundësia për të luajtur me Kroacinë, do të formojnë dyshen qendrore në mesfushë – “zemra e skuadrës”, siç e quan Foda – me potencialin për t’u kthyer në legjenda të kombëtares kosovare.
Portierë dhe mbrojtës me të kaluar helvetike
Portieri Amir Saipi (25), aktualisht te FC Lugano, ka luajtur më parë për grupmoshat e Zvicrës. I rritur në Schaffhausen, ai vendosi të ndërrojë kombëtare për shkak të mungesës së perspektivës te “Nati”. Nga ana tjetër, Arijanet Muric (26), që u formua në Zvicër te YF Juventus, FCZ dhe GC, përfundoi në akademinë e Manchester City dhe zgjodhi Kosovën pas një periudhe me ekipet e reja të Malit të Zi.
Në mbrojtje, Fidan Aliti (31), i lindur në Binningen pranë Bazelit, është një emër i njohur për tifozët e FC Zürich, pasi ishte pjesë e ekipit kampion në vitin 2022. Ai rikthehet për të udhëhequr një prapavijë me përvojë në ndeshjen kundër Zvicrës.
Dardanë në pritje dhe mungesa të ndjeshme
Bledian Krasniqi (24), i lindur në Zürich dhe aktualisht pjesë e FCZ, është në listën rezervë së bashku me Donat Rrudhani dhe Kreshnik Hajrizi (të dy 26 vjeç dhe pjesë e FC Sion). Ndërsa Florent Hadergjonaj (31), që ka një të kaluar me Zvicrën – përfshirë një ndeshje miqësore me fanellën helvetike – mungon për shkak dëmtimi të pësuar me Alanyaspor.
Një mungesë tjetër e madhe është ylli i ekipit, Edon Zhegrova (25). Fantazisti i lindur në Gjermani dhe ish-lojtar i FC Basel, u prezantua së fundmi nga Juventus, por për shkak të dëmtimeve nuk ka luajtur ende në këtë sezon dhe nuk është në dispozicion për ndeshjen në “Joggeli”.
Më shumë se një ndeshje…
Kjo ndeshje mes Zvicrës dhe Kosovës është shumë më tepër sesa një betejë për tre pikët. Është një takim simbolik, ku shumë lojtarë ndihen si në shtëpi në të dyja kampet. Nga rrugicat e Zürich-ut, e deri te stadiumet e Prishtinës, këta futbollistë kanë kaluar kufij e zgjedhur rrugë me zemrën dhe karrierën në mendje.
E premta nuk do të jetë thjesht një betejë sportive – do të jetë një përballje emocionale mes dy realiteteve që prej kohësh janë të lidhura ngushtë. Për disa lojtarë, do të jetë përfaqësimi i kombit që i dha gjithçka. Për të tjerët, do të jetë momenti për të nderuar rrënjët.
