Është njëra nga libraritë më të frekuentura në vend, e cila ka edhe degë të tjera në Kosovë.
Pjesë e saj janë mbi 50 punëtorë.
Por, zgjerimi i biznesit të librarisë, vlerësohet se do të mbetet peng i luhatjeve të çmimit të rrymës.
Kjo meqë, energjia elektrike është faktor kyç për funksionimin e këtij biznesi.
“Komplet bizneset ngrohemi me rrymë, madje do të detyrohemi të bëjmë zvogëlimin e aparaturave që kanë të bëjnë me energji elektrike. Pastaj ndikon tek numri i punëtorëve, që detyrohemi të mos kemi shtim të stafit. Madje duhet të bëjmë njëfarë kushtëzimi për zhvillime më të lehta të biznesit”, thotë Elez Morina, drejtor rajonal i Altera.
Paralajmërimi i Zyrës së Rregullatorit të Energjisë (ZRRE) në Kosovë se, nga muaji prill, faturat e energjisë elektrike mund të rriten për 15 për qind ka shqetësuar edhe më shumë udhëheqësinë e librarisë.
Pasi që, tek ky biznes kanë reflektuar edhe rritjet e mëhershme të çmimit të rrymës.
“E kemi pasur të vështirë duke u bazuar në vitin 2024, ku në këtë vit në muajin janar fatura e rrymës ka qenë 2 mijë e 584 euro. Ndërsa, janari i vitit 2025 ka ardhë fatura 3 mijë e 68 euro. Është një diferencë rreth 400 euro. Është çmim shumë i lartë”, shprehet Morina.
Rrjedhimisht, ata paralajmërojnë se do të ketë edhe shtrenjtim të produkteve që ata ofrojnë.
“Faturat që vijnë me rritje të çmimeve të produkteve, detyrohemi që automatikisht që edhe ne të bëjmë lëvizje të çmimeve, pra ngritje”, thotë ai.
Kundër shtrenjtimit të rrymës janë paralajmëruar edhe protesta për në muajin prill, ku llogaritet si koha kur aktivizohen tarifat e reja.
