Mëngjesin e së mërkurës në një nga bankomatët në Prishtinë u deponuan afro 900 euro të falsifikuara.
E gjitha ngjarja ndodhi në rrugën “Agim Ramadani” në kryeqytet.
Për këtë rast Policia e Kosovës ka nisur hetimet.
“Ankuesja femër kosovare, menaxhere e bankës ka njoftuar se në bankomatin e tyre janë deponuar 870 € që dyshohet të jenë të falsifikuara. Parat e dyshuara janë konfiskuar. Rasti duke u hetuar”, thuhet në raportin ditor.
E të mërkurën një rast i njëjtë u raportua edhe në Fushë-Kosovë.
“Ankuesja femër kosovare, punëtore e bankës ka njoftuar se në bankomatin e tyre janë deponuar monedha metalike me vlerë rreth 451 € si dhe 2X5 € të letrës të cilat dyshohet se janë të falsifikuara. Parat e dyshuara janë konfiskuar. Rasti duke u hetuar”, thuhet në njoftimin e PK-së.
Por këto nuk janë rastet e vetme.
Nga Oda Ekonomike bëjnë me dije se muajve të fundit bizneset janë në hall me parat e falsifikuara që po qarkullojnë.
Qarkullimi i parave të falsifikuara ka pasoja negative për ekonominë e vendit, sipas ekonomistit, Mustafë Kadrija.
Ndër monedhat më të falsifikuar në tregun e Kosovë, kohëve të fundit është monedha metalike 2 euro.
