Edhe pse kanë kapacitet që produktet e djathit, mishit e ato me përmbajtje shtazore t’i eksportojnë, bizneset kosovare nuk po arrijnë që t’i shesin në shtetet e Bashkimit Evropian. Kjo pasi Kosova nuk i plotëson kërkesat për eksport të këtyre produkteve në këto shtete. Bizneset thonë se po dëmtohen, derisa nga Dhoma e Tregtisë kërkojnë të bëhet një zgjidhje.
Me gjithë kërkesat e shumta që kanë, bizneset në Kosovë nuk po arrijnë të eksportojnë produktet e tyre me origjinë shtazore në shtetet e Bashkimit Evropian. Kjo për shkak se Kosova nuk po i plotëson kriteret e BE-së për t’i eksportuar të njëjtat.
Afaristi Burim Piraj, thotë se vazhdimisht kanë kërkesa për eksport të produkteve të tyre.
“Kemi kërkesa edhe nga Britania e Madhe por, që kohët e fundit ato kërkesa janë zvogëluar pasi të gjithë e kanë kuptuar që ne nga Kosova nuk mund të eksportojmë produkte me origjinë shtazore”, tha ai.
Sipas Dhomës së Tregtisë dhe Industrisë, bizneset në Kosovë kanë përmbushur të gjitha kriteret për eksportimin e produkteve të tyre me origjinë shtazore.Nga kjo Dhomë kanë kërkuar që institucionet së bashku të gjejnë një zgjidhje për këto biznese.
Kushtrim Ahmeti, koordinator në Dhomën e Tregtisë dhe Industrisë tha se ata kanë bërë përpjekje të vazhdueshme për këtë çështje.
“Në këtë rast po humbin bizneset tona, ekonomia e vendit po pëson, bizneset po pësojnë, mundësi të rritet numri i punëtorëve po pëson. Sepse s amë shumë që ka eksport atëherë nevoja është edhe për rritje punësimi, pra është një zinxhir shumë i madh ekonomik që po përjeton dëme nga një pamundësi që është shumëvjeçare”, tha Ahmeti, shkruan RTK.
Ndërsa, nga Agjencia e Ushqimit dhe Veterinarisë kanë përmendur kriteret të cilat nuk janë plotësuar në mënyrë që t’i jepet drita e gjelbër eksportit.
Lamir Thaçi, zëdhënës i Agjencisë së Ushqimit dhe Veterinarisë ka treguar se aktualisht vetëm një biznes në Kosovë eksporton produktet shtazore në shtetet e BE-së.
“Ne duhet fillimisht si shtet të jemi anëtare e disa organizatave, ku përfshihet edhe Organizata për Shëndetin e Kafshëve dhe pas anëtarësimit që do të behet në këto organizata, i kemi edhe disa detyra të shtëpisë që duhet t’i kryejmë për disa vite ku i nënshtrohemi auditimeve të ndryshme”, tha ai.
