Zëvendëskryeministri i Kosovës, Besnik Bislimi, priti në takim zëvendësdrejtorin për Evropë i Shërbimit Evropian të Veprimit të Jashtëm të BE-së, Marko Makovec.
Në këtë takim është diskutuar për sulmin terrorist të 24 shtatorit, ku grupi i armatosur serbë sulmoi Policinë e Kosovës dhe vrau rreshterin, Afrim Bunjaku.
“Z.Makovec shprehu ngushëllimet e tij për vrasjen me 24 shtator të Rreshterit të Policisë së Kosovës, tashmë Hero i Kosovës, Afrim Bunjakun. Po ashtu, ai vlerësoi lartësisht profesionalizmin, maturinë e menaxhimin e situatës nga Policia e Kosovës”, thuhet në njoftimin e Zyrës së Kryeministrit.
Gjithashtu, është bërë e ditur se gjatë takimit është Bislimi e ka informuar në detaje Makovecin rreth agresionit terrorist.
“U diskutua më hollësisht rreth këtij agresioni terrorist, paramilitar e kriminal, ku zëvendëskryeministri Bislimi e informoi z. Makovec rreth detajeve të këtij operacioni që shpërfaqin objektivat e Serbisë me synim në destabilizimin e rajonit. Gjithashtu në takim u bisedua dhe mbi pritshmëritë në kuadër të agjendës së integrimeve evropiane”, thuhet tutje në njoftim.
“Zëvendëskryeministri Bislimi theksoi se Republika e Kosovës e vlerëson lartësisht iniciativën e Komisionit të BE-së për planin e ri për zgjerim. U theksua dhe se procesi i integrimit evropian duhet të jetë i bazuar në meritokraci dhe të ofrojë instrumentet e barabarta për të gjitha shtetet, me qëllim avancimin e agjendës evropiane e përmbushjen e reformave”./teve1.info/
