Zëvendëskryeministri i Kosovës, Besnik Bislimi, të shtunën ka mirëpritur në takim një delegacion nga Parlamenti Evropian, i cili po monitoron e vëzhgon procesin zgjedhor në Kosovë.
Sipas komunikatës në këtë takim, delegacioni drejtohej nga eurodeputetja nga Portugalia, Marta Temido, e cila është edhe kryetare e delegacionit portugez të socialistëve dhe demokratëve në Parlamentin Evropian që nga viti i kaluar.
Prezent po ashtu ishin dhe eurodeputetë nga Kroacia, Gjermania, Italia, Franca dhe Belgjika.
“Gjersa e njoftoi delegacionin me sukseset dhe të arriturat e qeverisë përgjatë këtij mandati qeveritar, zëvendëskryeministri Bislimi theksoi ndër të tjera edhe rritjen ekonomike, rishpërndarjen e saj drejt qytetarëve, rritjen e pagës minimale, uljen e papunësisë, politikat incentivuese për gratë e avancimin në integrimin evropian”, thuhet në komunikatë.
Në vijim thuhet se Bislimi ka folur edhe për zgjedhjet e nesërme dhe fushatën e zhvilluar përgjatë këtij muaji.
“Theksoi rëndësinë e zgjedhjeve të ditës së nesërme, veçanërisht në mbarëvajtjen e tyre, për një proces demokratik dhe transparent”, theksohet në komunikatë.
Gjithashtu bëhet e ditur se ai e ka falënderuar Parlamentin Evropian për mbështetjen e vazhdueshme ndaj Kosovës, veçanërisht atë në përkrahjen drejt rrugëtimit në integrimin evropian./teve1.info/
