Zëvendëskryeministri i Kosovës, Besnik Bislimi, ka pritur një delegacion nga Komiteti Ekonomik dhe Social Evropian, të kryesuar nga Dimitris Dimitriadis, drejtor i zyrës për Marrëdhënie me Jashtë, raporton teve1.info
Sipas komunikatës për medie, Bislimi me delegacionin evropian ka diskutuar mbi integrimin evropian të vendit dhe proceset në të cilat po kalon Republika e Kosovës në rrugëtimin e saj drejt Bashkimit Evropian.
Sipas komunikatës për medie, Bislimi i ka njoftuar mysafirët për të arriturat n fushën ligjore, derisa ata janë shprehur të impresionuar me arritjet në këtë drejtim.
“Ky takim ishte produktiv dhe me vlerë në kuadër të diskutimit mbi agjendën evropiane të Kosovës, dialogun social në vend, zhvillimet dhe hapësirën për shoqërinë civile dhe të drejtat e punëtorëve, fusha këto në të cilat Qeveria u përgëzua nga delegacioni për reformat e ndërmarra, progresin dhe punën e zhvilluar.
Ata u shfaqën të impresionuar në lidhje me kornizën ligjore dhe mekanizmat e integruara sa i përket konsultimeve publike, përfshi ato në nivel lokal”, thuhet në komunikatë.
Sipas njoftimit, në takim u diskutua edhe për mekanizmat për përkrahje të punësimit të të rinjve përmes skemave si, ‘’Superpuna’’, punësimit të grave dhe skema të tjera të përkrahjes nga Qeveria.
“Përmirësimi i përkrahjes financiare për OJQ-të, u përmend si objektiv i përbashkët, ku edhe partnerët tanë mund të kontribuojnë, sidomos tani që kemi një kornizë të fuqizuar për përkrahje nga fondet publike, duke veçuar nismat për financimin e organizatave dhe projekteve të të rinjve e për të rinjtë dhe po ashtu atyre në fushën e kulturës.
Zëvendëskryeministri Bislimi foli edhe mbi integrimin evropian të vendit e proceset në të cilat po kalon Republika e Kosovës në rrugëtimin e saj drejt Bashkimit Evropian”, thuhet në komunikatë.
