Zëvendëskryeministri i parë për Integrim Evropian, Zhvillim dhe Dialog i Republikës së Kosovës, Besnik Bislimi, të premten ka mirëpritur Shefin e ri të zyrës së BE-së në Kosovë, ambasadorin Aivo Orav.
Në komunikatë thuhet, se në këtë takim të parë njoftues dhe pune, Bislimi i ka uruar mirëseardhje të përzemërt në Kosovë ambasadorit Orav si dhe i ka shprehur përkushtimin e gatishmërinë për të ndërtuar një partneritet të ngushtë për përparimin e agjendës evropiane të Kosovës.
“Në fokus të bisedës ishin marrëdhëniet ndërmjet Kosovës dhe Bashkimit Evropian, lidershipi i ri pas zgjedhjeve evropiane, bashkëpunimi ndërinstitucional, qeverisja dhe progresi i Kosovës në demokratizim, sundim të ligjit, politikat energjetike dhe reformat ekonomike, të cilat së fundi u përshëndetën edhe nga Presidentja e Komisionit Evropian, Ursula von der Leyen”, bëhet e ditur në komunikatë.
Po ashtu, zëvendëskryeministri Bislimi, ka theksuar angazhimin e Kosovës për të vazhduar reformat e nevojshme që do të avancojnë pozicionin e saj drejt marrjes së pyetësorit para statusit kandidat të BE-së, dhe ka konfirmuar angazhimin në përmbushjen e reformave nga Plani i Rritjes./teve1.info/