Zëvendëskryeministri, Besnik Bislimi, ka pritur në takim koordinatoren për Zhvillim të Kombeve të Bashkuara, Arnhild Spence.
Iniciativat, programet e projektet e përbashkëta ishin në fokus të diskutimit ndërmjet tyre, teksa Spence ka rikujtuar gatishmërinë e 17 agjencive të Kombeve të Bashkuara, për t’i mbështetur synimet e Qeverisë së Kosovës.
“Znj. Spence përsëriti gatishmërinë e 17 agjencive të Kombeve të Bashkuara që janë të pranishme në Kosovë për të mbështetur synimet e Qeverisë së Kosovës, vlerësoi pozitivisht bashkëpunimin e deritanishëm si dhe ritheksoi përgëzimin për Qeverinë e Kosovës për faktin se janë mes 23 vendeve nga 130 që kanë regjistruar zotimet e tyre për Objektivat për Zhvillim të Qëndrueshëm (SDG) në platformën elektronike të OKB-së gjatë këtij viti”, thuhet në komunikatë.
Njëherit, Bislimi ka folur rreth masave të ndërmarra nga Qeveria, të cilat targetojnë e kanë qëllim zvogëlimin e eliminimin e pabarazive në shoqëri si dhe angazhimin e përkushtimin për thellim të bashkëpunimit.
Kosova mbetet e përkushtuar në avancimin e fokusimit tutje në katër prioritetet kryesore të politikave: për të zvogëluar shkallën e varfërisë, rritur kapacitetin e energjisë së ripërtëritshme, për transformim digjital, si dhe ndërmarrjen e reformave të rëndësishme në fushën e arsimit./teve1.info/.
