Zëvendëskryeministri për Integrim Evropian, Besnik Bislimi, ka pritur në takim Zëvendësdrejtorin e Departamentit për Ballkan në Ministrinë për Evropë dhe Punëve të Jashtme të Francës, Nicolas Faye dhe Ambasadorin e Francës në Kosovë, Olivier Guerot.
Bislimi njoftohet se i ka falënderuar diplomatët francezë për mbështetjen e tyre për të ardhmen e Kosovës.
Në njoftim po ashtu thuhet se projekte të ndryshme po fillojnë të marrin formë në mes dy vendeve tona, të cilat në vijim do të mund të kalojnë në fazat implementuese.
“Këto projekte prekin fusha e sektorë si tranzicioni drejt energjisë së gjelbër, efiçenca e energjisë apo dhe trajtimi i ujërave të zeza”, thuhet në një njoftim.
Në takim u diskutua dhe mbi procesin e dialogut dhe implementimin e Marrëveshjes Bazë të normalizimit të marrëdhënieve dhe Aneksit të Zbatimit.
“Zëvendëskryeministri Bislimi potencoi se Qeveria e Republikës së Kosovës mbetet e përkushtuar dhe e angazhuar, aktive e konstruktive në këtë proces ku përfitues kryesorë duhet të jenë të gjithë qytetarët”, ceket në komunikatë.