Ish-zëvendëskryeministri Besnik Bislimi ka reaguar publikisht pasi nuk është përfshirë në përbërjen e ekzekutivit të ri në Qeverinë Kurti 3.
Përmes një postimi në Facebook, Bislimi ka falënderuar kryeministrin Albin Kurti për mundësinë që i është dhënë gjatë mandatit të kaluar, duke theksuar se ka bërë më të mirën në ushtrimin e detyrës së tij.
Ai ka përmendur disa nga të arriturat gjatë kohës sa ishte pjesë e ekzekutivit, përfshirë liberalizimin e vizave, avancimin në zbatimin e reformave të agjendës evropiane dhe aplikimin për anëtarësim, si dhe zhvillimin e politikave që, sipas tij, kanë sjellë gjithëpërfshirje, barazi dhe rritje të qëndrueshme ekonomike.
Bislimi ka theksuar gjithashtu rolin e tij në përfaqësimin e Kosovës në dialogun në Bruksel, duke thënë se ka mbrojtur interesat e shtetit dhe ka prezantuar Kosovën si palë në këtë proces.
“Liberalizimi i vizave, avancimi në zbatimin e reformave të agjendës evropiane dhe aplikimi për anëtarësim, zhvillimi dhe politikat që sollën gjjithëpërfshirje, barazi dhe ritëm të qëndrueshëm të rritjes ekonomike dhe përfaqësimi i Kosovës në dialogun në Bruksel, për të mbrojtur interesat e shtetit tonë dhe prezantuar Kosovën si palë në këtë proces. Këto ishin disa prej të arriturave dhe punëve që i shtyem përpara dhe realizuam gjatë mandatit të kaluar. Mirënjohje të thellë për Kryeministrin Kurti, për mundësinë e dhënë që të kontribuoj në këto procese të rëndësishme. Falënderoj kolegët nga kabineti qeveritar e gjithashtu edhe ekipin tim që më ka shoqëruar në këto 5 vite, për bashkëpunimin e shkëlqyeshëm dhe rrugëtimin e përbashkët që na ka përcjellë mes sfidash dhe suksesesh të shumta. Këtë mandat e kemi bërë më të mirën”, ka shkruar ai.
Në fund të reagimit, Bislimi është shprehur se mandati i ri qeveritar do të jetë edhe më i suksesshëm, me më shumë përgjegjësi dhe besim nga qytetarët, si dhe me të arritura të reja në progresin demokratik dhe zhvillimin ekonomik të vendit.
Ndryshe, postin e zëvendëskryeministrit të parë në Qeverinë Kurti 3 për katër vitet e ardhshme do ta mbajë Glauk Konjufca./teve1.info/
