Zëvendëskryeministri i Parë për Integrim Evropian, Zhvillim dhe Dialog i Republikës së Kosovës, Besnik Bislimi dhe ministri Financave, Punës dhe Trasfereve, Hekuran Murati kanë qëndruar pesë ditë në Shtetet e Bashkuara të Amerikës.
Bsilimi ka thënë se qëndrimi pesë ditor në ShBA ka sjellë rezultate pozitive dhe lajme të mira për vendin.
Ai ka treguar se me FMN-në, konfirmuan se Kosova do të jetë shteti i parë në Evropë që do të përfitojë nga instrumenti më i ri “Resilience and Sustainability Fund”.
“Përmes këtij programi fillimisht do të vihet në dispozicion shuma prej 80 milionë euro dhe me mundësinë e zgjerimit për edhe 80 milionë euro tjera. Mjetet nga programi RSF pritet t’i vihen në dispozicion Kosovës për investime në ndërtim të kapaciteteve të reja të energjisë së ripërtërishme me erë dhe diellore. Pjesa tjetër e mbështetjes do të jetë në formën e një Aranzhimi për Gatishmëri (precautionary SBA) në vlerë prej 100 milionë euro për 2 vitet e ardhshme”, ka shkuar Bislimi në Facebook.
Ai tutje ka njoftuar se në takimet me Bankën Botërore është diskutuar rreth projekteve të mundshme në të ardhmen mbi investime infrastrukturore që synojnë përmirësime.
“Në përmbyllje të kësaj vizite, nuk mund të mungonte dhe takimi i afërt dhe i përzemërt me mërgatën tonë. Folëm për ekonominë në vend dhe investime të mërgatës në nisma të prodhimtarisë në Kosovë”, ka shkruar ai mes tjerash. /teve1.info/
