Zëvendëskryeministri, Besnik Bislimi, ka pritur në takim delegacionin e FMN-së, të udhëhequr nga Gabriel Di Bella.
Sipas një komunikate, thuhet se Di Bella ka vlerësuar dhe përgëzuar Kosovën për të arriturat në fushën e ekonomisë e linjën e plotë të ndjekur me rekomandimet e FMN-së.
“Zëvendëskryeministri i parë për Integrim Evropian, Zhvillim dhe Dialog i Republikës së Kosovës, Besnik Bislimi, ka pritur ditën e djeshme në takim një delegacion të FMN-së, të udhëhequr nga Gabriel Di Bella.Përfaqësuesi i FMN-së vlerësoi lartësisht dhe përgëzoi vendin tonë për të arriturat në fushën e ekonomisë e linjën e plotë të ndjekur edhe me rekomandimet e FMN-së. Zëvendëskryeministri Bislimi e falënderoi z. Di Bella dhe Fondin Monetar Ndërkombëtar për mbështetjen dhe besimin ndaj Kosovës edhe në lidhje me programin në kuadër të instrumentit më të ri të FMN-së të quajtur Resilience and Sustainability Fund, nga i cili Kosova është përfitues”, thuhet në komunikatë.
Më tej, Bislimi ka theksuar që Qeveria e Kosovës mbetet e përkushtuar ta përforcojë bashkëpunimin me FMN-në dhe institucionet e tjera ndërkombëtare për ngritje të kapaciteteve dhe zhvillimit të vendit.
