Bislimi tha se Serbia u tërhoq nga plani për djegien e Jarinjes, raporton Teve1.info
Sipas tij, intensiteti i sulmeve hibride të Serbisë dhe Rusisë ndaj Kosovës është rritur djeshëm.
“Dje Serbia nuk i ndaloi huliganët serbë – ajo u tërhoq nga plani për djegien e Jarinjës. Intensiteti i sulmeve hibride të Serbisë dhe Rusisë ndaj Republikës së Kosovës është rritur ndjeshëm. Grafiku i punuar nga institucionet e sigurisë, që pasqyron vetëm krizën e djeshme në Jarinjë, tregon qartë edhe aktorët e përfshirë dhe autorin e vërtetë, Putinin”, ka shkruar ai në një postim në Facebook.
Bislimi thotë se ka pasur plan ruso-serb, që dje të digjej pika kufitare e Jarinjës, por sipas tij u parandalua nga Kosova në bashkëpunim me amerikanët.
“Ka pasur plan ruso-serb, që dje të digjej pika kufitare e Jarinjës. Ky plan u parandalua nga institucionet e Republikës së Kosovës (veçmas mekanizmat e sigurisë), në bashkëpunim me partnerët perëndimorë (veçmas amerikanët). Pavarësisht se policia e Serbisë, dje u shfaq duke i ndaluar huliganët që mos ta djegin Jarinjën, ky quhet vetëm një akt tërheqjeje nga ana serbe, duke e parë se një gjë e tillë do t’iu dështonte”, deklaroi ai.
Po ashtu, Bislimi theksoi se siç Serbia e ka aleat Rusinë e Kinën, Kosova ka aleat Perëndimin e SHBA-në.
“Siç e ka Serbia aleat Rusinë e Kinën, ne e kemi aleat Perëndimin dhe SHBA-në. Ata përfaqësojnë agresionin, ne përfaqësojmë lirinë!”, tha Bislimi.
Serbët kanë protestuar dje afër pikëkalimit kufitar mes Kosovës dhe Serbisë, Jarinjë, – në anën e territorit serb, si shenjë mbështetjeje ndaj serbëve lokalë që kanë ngritur barrikada në veri të Kosovës. /Teve1.info/