Zëvendëskryeministri i Kosovës, Besnik Bislimi tha se Kosova është mirënjohëse për mbështetjen e vazhdueshme të Republikës Çeke në procesin e integrimit të Kosovës në Bashkimin Evropian dhe anëtarësim në Këshill të Evropës.
Bislimi në konferencën për medie pas takimit me ministrin çek, Martin Dvorak tha se e ka informuar atë me reformat që Kosova planifikon t’i ndërmarrë si pjesë e iniciativës për rritje të Bashkimit Evropian.
“Unë e kam informuar sot zotëri Dvorak në lidhje me reformat që vendi im planifikon të ndërmarrë si pjesë e iniciativës për rritje të Bashkimit Evropian. Reformat të cilat menjëherë theksojnë dhe paraqesin vizionin dhe punën drejtë Bashkimit Evropian, vlerave të saj”, tha Bislimi.
Derisa theksoi se gjatë takimit është biseduar për dialogun mes Kosovës dhe Serbisë dhe masat e Bashkimit Evropian kundrejtë Kosovës. Gjë për të cilën Bislimi tha se duhet që sa më parë të hiqen.
“Ne kemi biseduar për masat aktuale kundrejtë Republikës së Kosovës, që masat duhet të hiqen sa më shpejtë që është e mundur. Por më e rëndësishmja procesi i dialogut, duhet të ndahet nga procesi i integrimit të Kosovës, që fokusi të kthehet te aspirate e vendit tonë drejt Bashkimit Evropian. Ne e mirëpresim këtë bashkëpunim të shkëlqyeshëm dhe vlerësojmë kontributin që Republika Çeke ka dhënë dhe ka ndihmuar progresin e Kosovës në proceset kyqe”, shtoi Bislimi./teve1.info./
