Me ftesë nga ministri për Bashkimin Evropian të Polonisë, Adam Szłapka, zëvendëskryeministri Besnik Bislimi, mori pjesë në takimin informal ministerial të organizuar nga Presidenca e Polonisë e Këshillit të BE-së.
Temë diskutimi në këtë takim ishte “Kërcënimet hibride ndaj procesit të zgjerimit dhe kundërpërgjigja potenciale ndaj tyre”.
Në adresimin e tij, zëvendëskryeministri Bislimi ka theksuar sulmet hibride me të cilat edhe Kosova është përballur.
Në njoftim është bërë e ditur se Bislimi foli edhe mbi sulmet e vazhdueshme ndaj shtetit dhe sigurisë kombëtare, i fundit ai në infrastrukturë kritike, në kanalin e Ibër-Lepencit nëntorin e vitit të kaluar.
“Më tej, zëvendëskryeministri përmendi dhe sulmet në faqen e internetit të KQZ-së në zgjedhjet e fundit në vendin tonë, por edhe shpërndarjet e dezinformatave dhe lajmeve të rreme, veçanërisht përgjatë fushatës së zhvilluar, një rast prej tyre lajmi i rremë mbi rritjen e çmimit të energjisë për 35% vetëm pak ditë para mbajtjes së zgjedhjeve”, thuhet në njoftim.
Gjithashtu zëvendëskryeministri shprehu nevojën për sa më shumë unitet në Evropë dhe qasje të përbashkët në përballjen me sfidat që vijnë nga kërcënimet e sulmet hibride.
Ndërkohë, prezentë në këtë takim ishin ministra për çështje evropiane nga rajoni dhe Evropa, përfshirë shtetet anëtare dhe ato kandidate për anëtarësim, krahas edhe Komisioneres së Bashkimit Evropian për Zgjerim, Marta Kos./teve1.info/
