Zëvendëskryeministri i Kosovës, Besnik Bislimi ka thënë se aparati shtetëror serb është përgjegjës i zhdukjes së qytetarëve të Kosovës në periudhën e luftës.
Ai në Facebook theksoi se fatkeqësisht politika në Beograd nuk po kontribuon e as bashkëpunon në këtë çështje.
Teksa tha se “nuk do të ndalemi së kërkuari drejtësi”, pasi sipas Bislimit, ndriçimi i fatit dhe vendndodhjes së të zhdukurve është urgjencë kombëtare e humanitare.
“Ende pas më shumë se dy dekadave, Kosova kërkon zbardhjen e fatit të 1617 personave të zhdukur me dhunë gjatë luftës. Aparati shtetëror serb është përgjegjës i zhdukjes së qytetarëve tanë. Fatkeqësisht as aktualisht politika në Beograd nuk po shkëputet nga e kaluara e tyre dhe nuk po kontribuon e bashkëpunon as në këtë çështje.Ne nuk do të ndalemi së kërkuari drejtësi. Ndriçimi i fatit dhe vendndodhjes së të zhdukurve është urgjencë kombëtare e humanitare andaj dhe kemi detyrimin e përgjegjësinë të angazhohemi maksimalisht në gjetjen e bashkëqytetarëve tanë”, tha Bislimi.
Ndryshe, sot është Dita Ndërkombëtare e Personave të Zhdukur. Më shumë se dy dekada pas përfundimit të luftës, në Kosovë vazhdojnë të mungojnë edhe mbi 1600 persona, të zhdukur me dhunë.
E kryeministri i vendit, Albin Kurti u bëri thirrje partnerëve ndërkombëtarë që ta rrisin presionin ndaj Serbisë, për 1 mijë e 617 të zhdukurit me dhunë gjatë luftës në Kosovë. Teksa tha se varret e hapura në Kosovë e “presin të vërtetën”./teve1.info./
