Zëvendëskryeministri i vendit, Besnik Bislimi, vlerësoi që masat e Komisionit Evropian karshi Kosovës, mund të kenë ndikuar në shkrimin e raportit të progresit për vitin 2023.
Gjatë debatit parlamentar në Kuvend për raportin e progresit të publikuar nga Komisioni Evropian për Kosovën, Bislimi i bëri thirrje BE-së që t’i tërheqë masat ndëshkuese sa më shpejtë, në mënyrë që fokusi të rikthehet tek integrimi evropian i vendit.
“Masat e Komisionit Evropian karshi Kosovës janë ende në fuqi dhe besojmë që ka mundësi që prezenca e këtyre masave, ka pasur ndikim në shkrimin e raportit, apo vlerësimin që i është bërë Kosovës. Kosova ka bërë hapat e duhur, andaj BE-ja sa më shpejtë duhet t’i tërheqë këto masa të cilat janë të kthyeshme dhe pa pasoja, e në mënyrë që fokusi të kthehet në avancimin e integrimit evropian të vendit. Mobilizimi për të kapur hapin në procesin e integrimit evropian pas stagnimit disa vjeçar, po jep frytet e veta”, deklaroi Bislimi para deputetëve.
Ndërkaq, sa i përket procesit të anëtarësimit në Bashkimin Evropian, zëvendëskryeministri tha se Kosova tashmë është e gatshme t’u përgjigjet pyetjeve teknike që vijnë nga Komisioni Evropian.
“Procesi i anëtarësimit në Bashkimin Evropian, duhet të jetë në plotni i bazuar në meritokraci. Kosova beson në të ardhmen e vet evropiane dhe si shembull i demokracisë në rajon, duhet t’i jepet mundësia ta dëshmojë këtë. Tani jemi të gatshëm t’o përgjigjemi mijëra pyetjeve teknike që vijnë nga Komisioni Evropian, në mënyrë që të vlerësohemi në formë objektive dhe ta marrim pastaj statusin e kandidatit”, shtoi tutje Bislimi.
Po ashtu, ky i fundit tha se angazhimi dhe përkushtimi i Qeverisë në rrugën drejt Bashkimit Evropian, është gjithnjë e më i madh./teve1.info/.
