Zëvendëskryeministri i Kosovës, Besnik Bislimi, ka thënë se Kosova ka bërë hapin e radhës më zbatimin e marrëveshjes, pas vendimit për tërheqjen edhe 25% të prezencës së Policisë së Kosovës afër dhe në objektet komunale në veri.
Ai ka thënë se marrëveshja e 10 korrikut ndërmjet Kosovës dhe BE-së ka për qëllim zbatimin e deklaratës së 27 vendeve të BE-së e lëshuar më 3 qershor.
“Kosova ka ndërmarrë hapin e radhës në zbatimin e marrëveshjes së 10 korrikut nga Bratislava. Rënie e mëtejshme e prezencës së policisë në dhe rreth ndërtesës së komunës pas përfundimeve të vlerësimit të përbashkët të sigurisë. Marrëveshja e 10 korrikut është ndërmjet BE-së dhe Kosovës dhe ka për qëllim të zbatojë deklaratën e BE27 nga 3 qershori. Masat e BE-së kundër Republikës së Kosovës deklarohen të përkohshme, të kthyeshme dhe në varësi të një përkushtimi të besueshëm për deeskalim”, ka shkruar ai.
Bislimi ka thënë Kosova po respekton angazhimet e saj dhe pret që të njëjtën ta bëjë edhe Serbia.
“Pas Marrëveshjes së Bratislavës, ka një proces të besueshëm drejt de-përshkallëzimit. Situata është e qetë tash e disa javë – konfirmuan dje bashkërisht PK-ja, KFOR-i dhe EULEX-i. Kosova po respekton plotësisht angazhimet e saj ,beson se pala tjetër do të bëjë të njëjtën gjë”, ka shkruar Bislimi.
Policia e Kosovës ka njoftuar se pas vlerësimit të situatës së sigurisë në veri e bërë bashkë me EULEX-in dhe KFOR-in, të premten do të largohen 25% e prezencës së Policisë së Kosovës afër dhe në objektet komunale në veri.