Zëvendëskryeministri i Kosovës, Besnik Bislimi, ka thënë se synimi kyç për këtë vit është pranimi i pyetësorit të Kosovës nga Komisioni Evropian për anëtarësim në BE.
Bislimi në takimin e 11-të i Komisionit Parlamentar për Stabilizim Asociim BE-Kosovë, tha se mosnjohja nga pesë shtetet e BE-së nuk ka qenë problem për vendimin e MSA-së dhe liberalizimin e vizave.
“Kosova mbetet vendi i vetëm në Ballkanin Perëndimor ka status kandidati për anëtarësim në BE. Ne besojmë se trajtimi i aplikimit të Kosovës është i mundshëm dhe para së gjithash i merituar. S’ka problem teknik që Kosovës t’i dërgohet pyetësori në mënyrë që kapacitetet tona institucionale, ato ligjore dhe administrative të vlerësohen. Mosnjohja nga pesë shtete nuk ka qenë problem për vendimin për MSA-në dhe liberalizimin e vizave. Vullneti i tillë dhe formulim i njëjtë duhet të përdoret edhe në këtë rast nga Këshilli i BE-së”, tha ai.
Bislimi shtoi se Kosova është një nga vendet më demokratike rajon, por sipas tij, mungesa e progresit në integrimet evropiane po shkaktohet nga sjellja e një regjimi autoritar rreth Kosovës, duke aluduar në Serbinë.
“Kosova është një nga vendet më demokratike në rajon. Kushtetuta jonë është më e avancuara në Evropë sa i përket mbrojtjes të drejtave të pakicave, apo komuniteteve jo shumicë. Megjithatë, mungesa e progresit në anëtarësimit të Kosovës në këto organizata nuk shkaktohet nga faktori i kualitetit të demokracisë apo të drejtave të njeriut dhe pakicave, por nga faktorë real jashtë kontrollit tonë, në këtë rast sjellja e një regjimi autoritar rreth nesh”, përfundoi Bislimi.
