Zëvendëskryeministri i Kosovës, Besnik Bislimi, ka përmendur disa nga të arriturat e Qeverisë brenda vitit 2023, gjithashtu ka treguar edhe pritjet për vitin e ardhshëm.
Bislimi ka thënë se gjatë vitit 2024 presin që bashkësia ndërkombëtare të reagojë lidhur me agresionin në Banjskë më 24 shtator, si dhe qasjen destruktive të këtij vendi në tërësi.
Bislimi më tej ka thënë se një nga të arriturat e Qeverisë është edhe zhbllokimi i procesit të liberalizimit të vizave, e hapat e parë drejt anëtarësimit në BE.
“E kemi bërë hapin e parë drejt anëtarësimit në BE në 2022 përmes dorëzimit të aplikimit në Pragë, e ku këtë vit punuam me Presidencën suedeze të Këshillit të BE-së, për trajtimin e kërkesës e për të cilët jemi falënderues për bashkëpunimin”, ka shkruar Bislimi në Facecbook.
Bislimi më tej ka përmendur edhe raportin për vendin nga Komisioni Evropian, ku sipas tij u theksua ulja e ndjeshme e nivelit të papunësisë nga 19% në 11.8%.
“E rritja ekonomike, vazhdoi me ritme pozitive në rreth 3.8%, më e larta në Ballkanin Perëndimor, konstatuar dhe nga Fondi Monetar Ndërkombëtar e Banka Botërore”, ka shkruar më tej ai.
Gjithashtu, ai tha se Kosova do të vazhdojë të jetë e kujdesshme dhe vigjilente, e përkushtuar për normalizimin e plotë të marrëdhënieve me njohjen reciproke në qendër, e zbatimin e marrëveshjeve reciprokisht, në mënyrë të drejtë, të balancuar e të barabartë.
Bislimi ka thënë se edhe targat dhe energjia ishin dy nga çështjet që sipas tij u adresuan dhe ecën drejt epilogut./teve1.info/
