Zëvendëskryeministri i vendit, Besnik Bislimi, ka deklaruar se Kosova e mirëpret planin e rritjes për Ballkanin Perëndimor.
Gjatë raportimit në Komisionin për Integrime Evropiane, Bislimi tha se BE-ja duhet të zgjerohet përmes dialogut drejt integrimit, derisa shtoi që Kosova e mirëpret qasjen kushtëzuese në fondet e BE-së.
Më tej, zëvendëskryeministri tha se Kosova tashmë i ka përmbushur obligimet e saj për heqjen e masave, teksa potencoi se BE-ja ka krejtësisht një qasje të pa balancuar që ka dëmtuar vendin.
“Ky plan do t’i sjellë rajonit rreth 6 miliardë euro të reja, ndërsa Kosova përfiton 950 milionë euro brenda katër viteve me grante dhe kredi. Kjo përben shumën më të madhe që Kosova e ka fituar ndonjëherë nga BE-ja për një periudhë relativisht të shkurtër kohore. Plani i rritjes është një shans për integrim dhe bashkëpunim më të ngushtë rajonal mes vendeve të Ballkanit Perëndimor. Në këtë kontekst është shumë e rëndësishme që BE-ja t’i tërheq sa më shpejt masat represive ndaj Kosovës, meqë Kosova ka përmbushur kërkesat bazë që kanë dalë para vendosjes së masave dhe kemi një situatë të qetë dhe përmes heqjes së masave, i gjithë fokusi kthehet në avancimin e integrimit evropian të Kosovës. Pra, ka qasje krejtësisht të pa balancuar të BE-së dhe një qasje që e ka dëmtuar vendin tonë. Masat e BE-së janë të kufizuara vetëm në takime të nivelit të lartë. Por, këto takime po vazhdojnë edhe më tej”, potencoi Bislimi.
Madje sipas tij, mund të ketë presion brenda vendeve anëtare, duke marrë parasysh faktin që Kosova është ende nën masat e BE-së.
“Ka presion dhe frustrim edhe brenda vendeve anëtarë se si ka mundësi që Kosova është nën masa vetëm se ka dërguar katër kryetarë të komunave në zyrat e tyre, ndërkaq Serbia nuk ka masa edhe për shkak të agresionit terrorist në Banjskë”, tha Bislimi.
Bislimi ka shtuar se synimi për këtë vit është pranimi i pyetësorit nga BE-ja, në mënyrë që të dëshmohet që Kosova e meriton statusin e vendit kandidat.
Njëherit, ai ka tha se institucionet e Kosovës janë të gatshme të përgjigjen./teve1.info/.
