Udhëtimet nga Drenasi në Prishtinë dhe anasjelltas i ka thuajse të përditshme.
Por, që nga dita e premte pagesën për këto udhëtime do ta ketë ndryshe.
Kjo meqë Shoqata e Transportit të Drenasit ka marrë vendim për shtrenjtimin e biletës për 50 cent.
Qytetari Ruzhdi Makolli vlerëson se ky çmim është mjaft i lartë.
“Varet tash edhe prej Komunës së po i shtrenjtojë ata duhet edhe këta pastaj, edhe udhëtar kanë shumë pak, por megjithatë është shtrenjtë. Drenas – Prishtinë një euro, tash është një euro e gjysmë ose dy se di sa e bëjnë. Jo mirë, por nuk kemi çka bëjmë”, shprehet qytetari Ruzhdi Makolli.
E dikush tjetër këtë ngritje të çmimit të biletës po e arsyeton.
“Mendoj se është e arsyeshme dhe e nevojshme të ngitet çmimi i biletave sepse derivatet po ngritën çdo ditë e autobusi shpenzon për derivate mirëmbajte e tjera. Për me pas qarkullim të rregullt duhet me mirëmbajte e me sa e mbaj mend unë prej që është ndërruar euro nga marka çmimi ka qenë i njëjtë, deri në Drenas ka qenë 70 /80 cent apo e kanë bërë një euro që është minimalja. Ngrijta është shumë e arsyeshme duhet më i kuptuar edhe këta që operojnë autobusët”, thotë Asllan Bajrami.
Për 50 cent është rritur edhe çmimi i relacionit Skenderaj – Prishtinë.
Bileta tashmë është bërë dy euro e gjysmë.
Kjo për Ismet Shalën, nuk është shumë.
“Unë udhëtoj nenstop me autobus nuk janë çmime të mira por betë janë lirë është më mirë me autobusë se me ardh me veturë, edhe me ardh me veturë nuk më paguhet kam respekt për të gjitha kompanitë”, thotë ai.
E në anën tjetër nga shoqata e transportit të Drenasit treguan arsyet se pse ka ardhur deri të kjo ngritje çmimi.
Ata thanë për televizionin se duke pasur parasysh se çdo sektor ka pësuar rritje, edhe këta u detyruan të veprojnë njësoj.
“Na është imponuar domosdo tani me e shtrenjtuar biletën, kemi arsye se Komuna nuk merret me mbrojtjen e transportit, në Komunë tonë ekziston edhe transporti ilegal ka kombi, kemi pas biseda e kërkesa po nuk është merr askush me ne. Udhëtar na janë larguar kaherë kanë shkuar me kombi, na është dashur me e ngrit biletën me një masë shumë të vogël çmim solid 50 cent është se 35 km Prishtinë – Drenas të udhëtosh nuk ka qenë çmim ka qenë vetëm mbijetesë. Në Prishtinë e kemi pas peronizimin 2.40 na është bë 4.50, parkingun e kanë bërë 5 euro, e që domethënë gjithçka është ngrit për ne”, ka thënë Rasim Shala, kryetar i shoqatës së transportit në Drenas.
Ngritje të çmimit të biletave ka pasur ditë më parë edhe në relacionin Gjilan – Prishtinë.
