Për dy çështje të cilat janë diskutuar kohëve të fundit në Kuvendin e Kosovës, ajo e Kodit Civil, i cili lejon martesën e gjinisë së njëjtë, dhe ajo e Ligjit për shëndet riprodhues dhe fertilizim të asistuar, myftiu i Republikës së Kosovës, Naim Tërnava, ka treguar qëndrimin e Bashkësisë Islame të Kosovës.
Myftiu Tërnava, martesën mes gjinisë së njëjtë e ka cilësuar haram, si dhe rreptësisht të ndaluar.
“Unë mundohem ta kuptoj pozitën edhe strategjike edhe gjeopolitike që ka Kosova, mundohem ta kuptoj edhe gjendjen politike që ka tani Kosova, mirëpo kjo assesi nuk guxon askujt t’i jap të drejtë që ai të bëjë diçka që shkon në dëm të ardhmërisë së vendit tim. I pëlqej dikujt, si pëlqej, pak qon peshë ajo. Fjala e Zotit është fjala e Zotit, porosia e Zotit është porosia e Zotit, porosi e Muhamedit a.s.. Le të thotë kushdo çka don. Martesa e të njëjtës gjini është haram, rreptësisht e ndaluar dhe u kry ajo punë”, ka thënë ai në emisionin “Fanari” në Tëvë1.
Ndërsa, për Ligjin e shëndetit riprodhues dhe fertilizim të asistuar, myftiu ka thënë se feja Islame është një fe që i përkrahë të arritur shkencore në mjekësi, por metoda që të blihen vezoret si një artikull ushqimor në fenë Islame nuk lejohet.
“Çifti bashkëshortor mund të ketë probleme njëri apo tjetri, dhe sigurisht Islami është fe që avancon dhe përkrahë të arriturat shkencore teknologjike. Elhamdyrillah, shkenca ka arritur shumë edhe në aspektin mjekësor. Zbulon dhe mund të marrë nga njëri të vendos, po them nga burri të vendos vezoret e femrës, apo nëse jo të marrë nga fryma vezor dhe nga mashkulli t’i bashkojnë e pastaj t’i kthejnë në trupin e femrës dhe të lind nga burri që është i martuar me kurorë, kjo lejohet në fenë e Islamit. Ndërsa, të merret ana tjetër dhe të shkohet të blihet, si me shku me ble një artikull ushqimor apo diçka tjetër, ajo në fenë Islame nuk lejohet”, ka thënë Tërnava.
Për fund, ai ka shtuar se i vjen keq që këto tema trajtohen në Kuvendin e Kosovës, ku sipas tij, ka gjëra të tjera më me rëndësi.
“Mua më vjen keq që këto tema trajtohen në Parlamentin e Kosovës, duke pasur parasysh se kemi gjëra tjera më primare që duhet t’i çojmë në vend, e jo të humbim kohë kaq të madhja për diçka që është kundër vetë natyrës së të qenurit njëri”, shtoi ai.
