Çmimi i naftës Brent, tregtuesit kryesor global të çmimit bruto të naftës, ka rënë në nivelin më të ulët që nga prilli i vitit 2021.
Krejt kjo ka ndodhur, pas tarifave të vendosura nga Presidenti i Shteteve të Bashkuara të Amerikës, Donald Trump.
Efektet e kësaj rënie, janë vërejtur edhe në Kosovë, me çmimet e derivateve të cilat kanë rënë ndjeshëm.
Kryetari i Shoqatës së Naftëtarëve të Kosovës, Fadil Bernjani thotë se çmimet do të duhej të uleshin edhe më shumë, mirëpo sipas tij kjo nuk varet nga ta.
“Ndryshe çmimet në tregun kosovar përafërsisht sillen: Diesel 1.18 cent deri 1.29 cent, Benzinë 1.19 cent deri 1.28 cent. Për gjendjen ekonomike çfarë e kem ne Kosovë çmimi real kishte me qen 1€. Çmimi i derivateve ka ulje nafta dhe benzina për nga 4 cent. Po kjo nuk varet nga qeveria dhe as nga shoqata e naftëtarëve po mbaret nga Berza dhe organizata prodhuese OPEC. Situata e sektorit te naftës ne tërë globin ka rënie”, thotë Berani.
Nafta, sipas ekspertit të ekonomisë, Adem Qorrolli, është vetëm një prej elementeve që kanë rënduar shpenzimet e qytetarëve.
“Ne jemi shtet që vetëm importojmë, nuk kemi industri prodhuese dhe sigurisht nëse ne importojmë çdo vendim si për rritje si për ulje të korporatave të mëdha apo të shteteve të fuqishme te ne e kanë tregun e gatshëm. Sepse këto institucione dhe këto politika nuk janë për biznese, këto janë vetëm për mbijetesë dhe politika sociale, kështu që ne duhet të kemi kujdes e çka po rritet e çka po shtrenjtohet se e kemi shportën bajagi të shtrenjtë”, vlerëson ai.
Në gjithë këtë situatë, sipas shoqatës “Konsumatori”, qeveria duhet t’i ndihmoj qytetarët duke ulur tatimet në disa produkte.
“Është mirë që të paktën derivati i naftës po lirohet, por unë pres, lus e apeloj Qeverinë që edhe ajo ta tregojë një çikë burrnie. Kemi disa lloje të obligimeve fiskale me çmimin e naftës se të gjitha ato duke blerë naftën i paguajmë ne si konsumator. E paguajmë taksën, paguajmë tatimin dhe akcizën të gjitha këto janë 300% mbi çmimin real të naftës, çmimin furnizues, unë e di që shteti duhet të jetoj prej dika, unë e di që jemi Sovran e si qytetar jemi themelues të shtetit nuk ikim prej obligimet tonë patriotik fiskal por aman edhe qeveria nganjëherë duhet të na lë të marrim frymë”, shprehet Selatin Kaçaniku nga shoqata “Konsumatori”.
Rreth një javë më parë, ministrja e Industrisë, Ndërmarrësisë dhe Tregtisë, Rozeta Hajdari, nënshkroi vendimin për rregullimin e çmimeve dhe vendosjen e masave të tjera mbrojtëse, për produktet e naftës.
