Kaosi me internet i cili nga mëngjesi i sotëm globalisht shkaktoi probleme në banka, aeroporte e media, përfshiu edhe Kosovën.
Burime të tëvë1 brenda bankave komerciale bëjnë të ditur se momentalisht nuk ka internet, ndërkaq si shkak i kësaj nuk po funksionojnë ATM e sistemi bankar.
Bëhet thirrje që të mos ketë panikë nga qytetarët, pasi që problemi pritet të zgjidhet brenda orësh.
Fluturimet janë pezulluar në Aeroportin e Sidneit, United Airlines ka ndaluar fluturimet dhe platforma e Grupit të Bursës së Londrës ka përjetuar ndërprerje të herëpashershme.
Një situatë kaotike është krijuar në supermarketet në të gjithë Australinë dhe programet e rrjeteve televizive janë ndërprerë për shkak të dështimit të sistemeve kompjuterike, raporton BBC
Të gjitha fluturimet e disa linjave ajrore kryesore amerikane – përfshirë Delta, United dhe American Airlines – u ndaluan sot për shkak të problemeve të komunikimit, tha Administrata Federale e Aviacionit (FAA).
Tokëzimi prek të gjitha fluturimet e linjave ajrore, pavarësisht nga destinacioni i tyre, tha FAA.
Është e paqartë se sa do të zgjasë pezullimi i fluturimeve dhe FAA ka njoftuar se do të dalë me një deklaratë të re për këtë çështje.
Shkaku i ndërprerjes në sektorin e IT-së është i paqartë, por shumë nga ata që janë prekur e kanë lidhur atë me sistemet operative të Microsoft PC.
Kompani të tilla si Jetstar dhe Virgin Airlines kanë raportuar probleme me sistemet e Microsoft.
Ndërprerjet e internetit po ndikojnë në institucionet në të gjithë Australinë, e kjo ka bërë që të mblidhet Mekanizmi Kombëtar i Emergjencave i Qeverisë australiane.
