Në disa universitete publike në vend sivjet pati rënie të numrit të studentëve që kanë aplikuar.
Madje në disa programe të Fakultetit Teknik në kryeqytet shihet të jetë një koeficient i uljes i theksuar krahasuar me vitet e kaluara.
Një ndër këto programe është edhe ai i Inxhinierisë së Ndërtimtarisë për të cilën dekani, Florim Grajçevci tregon disa faktorë që sipas tij mund të kenë ndikuar në rënie.
“Ka një rënie të vogël 2-3%, në disa programe studimi është më mirë në disa është më keq, prandaj themi që trendet e numrit të studentëve janë në rënie e sipër, është një koeficient i uljes i theksuar krahasuar me një dekadë ose dy pra është goxha e dukshme…”, thotë Grajqevci.
Mirëpo ndryshe nga ky program, në atë të inxhinierisë elektrike dhe kompjuterike po vlerësohet se pati interesim të lartë.
Ky interesim sipas profesorit Blerim Rexha vjen meqë FIEK-u si program është profitabil.
“Sikur çdo vit edhe këtë vit ka pas një interesim goxha të lartë në afatin e parë ne kemi plotësuar të gjitha kuotat që kemi pasë të rezervuara këtë vit në 410 studentë në programin e kompjuterisë inxhinerike dhe softerike dhe të gjitha vendet e lira i kemi plotësuar me nxënësit më të mirë të Kosovës që në afatin e parë të regjistrimit. Sepse tregu i punës ëahtë përcaktuesi kryesor dhe të rinjtë tanë janë zakonisht mirë të informuar për mundësitë e punësimit dhe tani pothuajse në këtë frymë Shoqata e Teknologjisë së Informacionit të Kosovës ka publikuar raportin e punësimit nga kompanitë të cilat veprojnë në Kosovë ku kanë dhënë një çmimore për rrogat e punëtorëve trë cilat sillen nga 700-2900 euro, dhe sipas mendimit tim këtu është arsyetimi pse ka interesim në këtë departament”, thotë profesori në Fakultetin e Inxhinierisë Elektronike dhe Kompjuterike, Blerim Rexha.
Sipas tij për rënien e numrit të studentëve në përgjithësi në Fakultetin Teknik, qeveria duhet të ndërmarrë mekanizma që të nxisë regjistrimin e të rinjve në këto drejtime, të cilat siç thotë ai kanë një perspektivë ndryshe ndaj drejtimeve tjera në vend.
