Gjashtë gra kanë pësuar lëndime dhe janë pranuar në QKUK, pas rënies së ashensorit nga kati i dytë në bodrumin e një ndërtese në lagjen “Emshir” në Prishtinë.
Pas ndihmës mjekësore emergjente, 5 të lënduarat janë liruar në shtëpi, kurse 1 është pranuar për trajtim të mëtejmë në Klinikën e Ortopedisë dhe është jashtë rrezikut për jetë.
Për rastin që ka ndodhur mbrëmjen e kaluar Policia e Kosovës ka thënë se ka nisur hetimet.
“Është raportuar se si pasojë e një ashensori i cili ka rënë në një ndërtesë nga kati i dytë në podrum, lëndime trupore kanë pësuar gjashtë persona viktima femra kosovare të cilat janë dërguar në QKUK për trajtim të nevojshëm mjekësor. Njësitë relevante kanë dalë në vendin e ngjarjes, rasti në procedurë hetimore”, thuhet në njoftimin e PK-së
Ndërsa, kompania për mirëmbajtjen e ashensorit, në një përgjigje për televizionin kanë thënë që nuk kanë pasur më herët probleme të tilla.
“Jo ma herët nuk kemi pas probleme, sidomos të kësaj natyre jo se jo. Ne kemi mirëmbajtje qe një kohë edhe rasti që ka ndodhë ne nuk e dimë çka është problemi se nuk jemi leju prej Policisë me pas qasje. Sot bëhet raporti…Sot pritet me dalë për ekzaminim dhe me përpilu një raport prej policisë”, ka thënë Zenel Gashi menaxher në “Hymeri Elevators’’
Edhe qytetarët banues në këtë objekt thonë që është hera e parë që ndodhë diçka e tillë në ashensor.
“Nuk ka pas naj zhurmë që me u dëgju, megjithëse vetëm kur e pamë që shiritat i kanë mshelë, ma shumë nuk dimë. Ka pas defekte ditore por në këtë formë jo”, ka thënë qytetari Bajram Imetaj.
“Me thanë të drejtën kam dëgju pak zhurmë por kam mendu që është kompania e pastrimit, sot në mëngjes e mora vesh çka ka ndodhë. Sidomos kohët e fundit është amortizu, ka fillu me dridh me sene por jo kështu nuk ka ndodhë asnjëherë”, thotë qytetari Bujar Ismaili.
Në rast prishjes së ashensorit rekomandohet që të kërkohet ndihmë përmes butonit të urgjencës së ashensorit ose telefonit, të mbahet distanca nga dera gjatë gjithë kohës, dhe të mos hapen dyert me forcë.
Kronika e realizuar nga gazetarja Albiona Hajdari
