Duke folur gjatë një fjalimi në një event elektoral në Filadelfia, Biden tha se është i shqetësuar nga raportimet se sulmuesi në fakt kishte cak kryeparlamentaren Pelosi.
“Unë fola në telefon me Nancy-n. Ajo tha se ai është mirë. Raportimet e medieve tregojnë se synohej të ishte një sulm ndaj Kryetares që u përdor më gjashtë janar në sulmet në Kapitol. Nuk po e shpik këtë, po raportohet. Nuk mund ta garantoj. Mund t’ju them se çfarë po raportohet. Thirrja ishte: Ku është Nancy? Ku është Nancy? Kjo është e neveritshme. Ka shumë dhunë, dhunë politike, shumë urrejtje. Mjaft është mjaft . Ngrihuni kundër dhunës në politikën tonë, pavarësisht se cila është politika juaj. Të gjithë së bashku si amerikanë”, tha Biden.
E ish-presidenti amerikan, Barack Obama, e quajti sulmin ndaj Paul Pelosit si kërcënim për demokracinë.
“Dua të kaloj një moment vetëm për të bërë një lutje për mikun tim, Paul Pelosi i cili u sulmua. Ky është rezultati i një politike ku disa që janë në detyrë ose që synojnë poste, punojnë për të nxitur përçarje, për ti bërë njerëzit të kenë frikë nga njëri-tjetri për përfitimet e tyre. Ai themeli bazë i demokracisë sonë po vihet në pikëpyetje tani”, tha Obama.
Bashkëshorti i kryeparlamentares amerikane, Paul Pelosi, u sulmua të premten në mëngjes nga i dyshuari David Depape, me një çekiç në shtëpinë e qiftit në San Francisko.
82-vjeçari pësoi lëndime në kokë dhe në trup, përderisa mjekët të shtunën thanë se ai po shërohet pas operimit.
Sulmi ndodhi vetëm 11 ditë përpara zgjedhjeve të pjesshme, në të cilat krimi dhe siguria publike janë shfaqur si shqetësimet kryesore në mesin e amerikanëve.
Sulmi ngre pyetje në lidhje me sigurinë e anëtarëve të Kongresit dhe familjeve të tyre pasi kërcënimet ndaj ligjvënësve janë në nivelin më të lartë të të gjitha kohërave, dy vjet pas kryengritjes së dhunshme në Kongresin Amerikan./Tëvë1/
