Basketbollisti i Bashkimit, Tj Bickerstaff e ka fituar epitetin e lojtarit më të mirë për xhiron e fundit në Superligë.
Bickerstaff është shpallur basketbollisti më i mirë apo MVP, ka njoftuar Federata e Basketbollit të Kosovës, të hënën.
Bickerstaff ishte lider i Bashkimit në fitoren ndaj Trepçës në ndeshjen derbi të xhiros së tretë, duke regjistruar 15 pikë, 15 kërcime dhe 5 asistime.
Me indeksin e lojës 33, Bickerstaff ka zënë vend edhe në top-pesëshen e javës, pjesë e së cilës janë edhe Trevon Allen i Golden Eagle Yllit, Deondre Burns i Sigal Prishtinës, Dardan Berisha i Pejës dhe Adem Mekiq i Borës.
Allen me 27 pikë, 9 kërcime e 4 asistime ishte më i dalluari në triumfin e Yllit ndaj Vëllaznimit, ndërsa Burns me 20 pikë, 5 kërcime e 4 asistime udhëhoqi Sigal Prishtinën drejt fitores kundër Rahovecit 029.
Dardan Berisha pati 22 pikë, 2 kërcime e 1 asistim në fitoren e Pejës në udhëtim te Bora, ku u veça Mekiq me 23 pikë, 10 kërcime e
8 asistime.
