Rreth 3 mijë euro i dha Komuna e Prishtinës për blerjen e një biçiklete të tillë.
Por, disa prej tyre po qëndrojnë në një serë në këtë oborr të shtëpisë në lagjen Kalabria në kryeqytet.
Kjo pamje shkaktoi habi te qytetarët.
Pas interesimit të televizionit, kompania që i menaxhon këto biçikleta, “Prishtina Parking” tregoi arsyen se pse këto mjete kanë përfunduar në këtë vend.
“Për shkak të stinës së dimrit, ne kemi marrë masa të posaçme për të siguruar mbrojtjen e biçikletave të “Prishtina Bikes”. Ato do të vendosen në stacione më dt. 01.03.2025. Aktualisht, jemi në fazën e mbushjes së biçikletave me rrymë elektrike, proces i cili zgjat 24 orë për një biçikletë, një hap kyç për funksionimin e duhur të tyre. Biçikletat përgjatë tre muajve kanë qenë të vendosura në ambient të mbyllur. Mirëpo, pjesë e procesit të mbushjes është ekspozimi i tyre në diell, duke përdorur energjinë solare për të optimizuar mbushjen si dhe për të garantuar performancë afatgjatë të biçikletave”, thuhet në sqarimin e tyre.
Sipas tyre, biçikletat janë të vendosura në një vend të sigurt dhe nën vëzhgimin e kamerave.
Televizioni ka tentuar të marrë një përgjigje se e kujt është prona mirëpo nuk kanë kthyer përgjigje.
Derisa nga Lëvizja Vetëvendosje në Prishtinë, që është opozitë e kritikon ashpër komunën për siç thonë ata, dëmtimin e pronës publike.
“Të lihen në këtë mënyrë biçikletat, është e pa pranueshme, sepse këtë mënyrë po dëmtohet pasuria publike, duke qëndruar ne ambient të hapur, e qe nuk mund të jenë rezistent ndaj shiut e bores. Andaj ato biçikleta në sezonen e dimrit qe nuk përdorën duhet te futen në ambiente të mbyllura, në mënyrë që mos të dëmtohen. Por edhe njëherë po dëshmohet se Komuna e Prishtinës e udhëhequr nga Përparim Rama-LDK, sillen në mënyrë të pa përgjegjshme me pasuritë publike”, ka thënë asambleisti Besart Krasniqi
Komuna ka thënë që këto biçikleta janë në menaxhim të “Prishtina Parkingut”.
Gjatë vitit 2023, Komuna e Prishtinës kishte ndarë 500 mijë euro për blerje të biçikletave inteligjente për kryeqytetin.
