Eksperti i sigurisë, Drizan Shala vlerëson se nesër mund të ketë tensionim të situatës në veri, gjatë procesit të betimit të kryetarëve të rinj.
Ai thotë se 30% është potenciali që të ketë incidente të një përshkallëzimi më të rëndë të sigurisë, ndërsa 70% do të jetë një ditë normale.
“A ka potencial të ngritet një tension? Ka potencial, potenciali ekziston në vazhdimësi, për arsye se në kuadër të këtyre aktiviteteve të këtyre grupeve të Beogradit, ka edhe interesa të klaneve të ngushta, të cilat në periudha të caktuar kohore mund të shfrytëzojnë edhe asetet shtetërore, pa dijeninë e kreut të shtetit të Serbisë, por duke shfrytëzuar asetet shtetërore, për interesat e tyre personale…30% që të kemi incidente të përmasës, një përshkallëzimi më të rëndë të sigurisë në pjesën veriore, 70% do të jetë një ditë normale e cila do të reflektojë me një mbledhje të qytetarëve, të përfaqësuesve të Listës serbe, të cilët mund të protestojnë të qetë para kluvendit komunal”, tha ai në “Info Nata” në Tëvë 1.
Sipas tij, Shtetet e Bashkuara të Amerikës nuk duan që palët të futen në një labirint i cili mund të prodhojë një tensionim të situatës.
Njohësi i rrethanave politike radhiti edhe disa arsye pse betimi i kryetarit në Mitrovicë të Veriut do ketë dallim nga betimi i tre kryetarëve të tjerë.
“Çështja e betimit të kryetarit në Mitrovicën e Veriut, do të dallojë nga betimi i tre kryetarëve të tjerë. Për shkak të pozicionit të aspektit gjeografik të Mitrovicës së Veriut e cila është afër Mitrovicës së Jugut, ka shtim të forcave të rendit të Republikës së Kosovës, mundësia e mbështetjes logjistike për sektorin e sigurisë në mbrojtjen e interesave të shtetit të Kosovës në atë pjesë, dhe të drejtës për të zgjedhurin nga populli, ndërsa në pjesën Leposaviq, Zveçan, Zubin Potok, distanca do të jetë shumë më e madhe sa i përket mbështetjes aspektit logjistik”, shtoi Shala.
Nesër, kryetarët e sapozgjedhur në katër komunat veriore me shumicë serbe në Mitrovicë të Veriut, Zubin Potok, Zveçan, dhe Leposaviq, do të duhej të bëjnë betimin si kryetar. Sipas njoftimeve, pritet betimi i kryetarit të Mitrovicës së Veriut, Erden Atiq, teksa informacione nuk ka edhe për tre komunat e tjera veriore.
Zgjedhjet e parakohshme lokale janë mbajtur më 23 prill, ku u bojkotuan nga Lista Serbe, si partia më e madhe me shumicë serbe. /Teve1.info/
