Me katër vota për, Besnik Berisha është zgjedhur kryetar i ri i Komisionit të Pavarur për Media (KPM). Kjo pas propozimit të disa nga anëtarët në këtë institucion që kryetari të zgjidhet të premten, meqenëse mandati i kryetarit, Jeton Mehmeti përfundon të martën.
E krejt kjo e zuri në befasi Mehmetin i cili tha se kjo është e paligjshme.
“Çështja është tek siguria ligjore. Prej këtij momenti kur zgjidhet një kryetar i ri nuk kam siguri për të vazhduar sepse janë shkeljet të ligjit ë KPM-së. Ligji është më i qartë se rregullorja, më obligative. Ne këtë aspekt nuk mund të vazhdoj këtë mbledhje meqë konsideroj se është zgjedhur një kryetar i ri…Jam i vetëdijshëm që mandatin e anëtarit të KPM-së nuk ma keni marrë sepse ma ka dhënë Kuvendi. Me këto vota që u bënë dhe këtë votim, që procesi është legjitim nuk ndiej siguri juridike të vazhdoj drejtimin e mbledhjes. Nuk po iki, nuk po zhdukem”, tha kryetari i Komisionin të Pavarur për Media, Jeton Mehmeti.
Mirëpo si të jashtëligjshëm nuk e panë anëtarët e KPM-së.
“Kryetari i sapo zgjedhur sot e vazhdon mandatin e tij nga dita e martë, e jo nga sot, KPM është e qartë në këtë pikë…Nuk ka shkarkim të kryetarit i bie që kryetari vazhdon deri në përfundim të mandatit, pas përfundimit vazhdon kryetari i ri”, tha ushtruesi i detyrës së kryeshefit ekzekutiv, Niman Racaj.
Madje, Mehmeti refuzoi që të drejtojë mbledhjen në vazhdim.
“Nuk mund të jemi në një sallë si dy kryetarë dhe për mua misioni si kryetar i KPM-së merr fund këtu. Nëse thirrim mbledhje tjetër, mund të marrë pjesë si anëtar sepse në bazë të mandatit që na ka dhënë Kuvendi mandati si anëtar vazhdon deri më datën 21.01.2025, tha Mehmeti.
E ky veprim ngjalli edhe diskutime se kur Berisha nis detyrën e re.
“Askund nuk thamë se mandati digjet këtu ose shkarkohesh. Ne kemi rastin më të mirë Gjykatën Kushtetuese, e kemi shembull, ne po bëjmë çfarë kanë bërë ata pak a shumë, po e zgjedhim kryetarin paraprakisht”, tha kryetari i zgjedhur i KPM-së, Besnik Berisha.
“Për çfarë arsye a mund të na shpjegosh kryetar se je duke e sabotuar pak punën”, tha nënkryetarja e KPM-së, Luljeta Aliu.
Me tri vota për, një kundër nga kryetari aktual i KPM-së Jeton Mehmeti dhe një abstenim nga anëtari tjetër Fatih Basha, është votuar propozimi për plotësim ndryshimin e rregullores së punës së brendshme të KPM-së, e cila flet për zgjedhjen e kryetarit dhe nënkryetarit të ri të KPM-së.
Komisioni i Pavarur i Mediave është organ kompetent për rregullimin, menaxhimin dhe mbikëqyrjen e spektrit të frekuencave të transmetimit në Kosovë. Ai është themeluar në vitin 2005 dhe ka për përgjegjësi të mbajë një sistem të drejtë dhe të hapur për licencimin dhe rregullimin e shërbimeve mediale audiovizuele dhe menaxhimin e spektrit të frekuencave të transmetimit në pajtim me standardet më të mira ndërkombëtare.
