E ardhmja e sulmuesit të Kombëtares shqiptare, Ernest Muçi, duket gjithnjë e më e paqartë te klubi turk Besiktas, vetëm disa muaj pas transferimit të bujshëm nga Legia e Varshavës.
Sipas raportimeve të fundit nga mediat turke, lojtari 23-vjeçar nuk shihet si pjesë e formacionit bazë të ekipit për sezonin e ri, duke ngritur pikëpyetje serioze mbi vazhdimësinë e tij në radhët e gjigantëve të Stambollit.
Muçi, i cili iu bashkua Besiktasit në merkaton e dimrit për një shumë prej 10 milionë eurosh, ka kontratë të vlefshme deri në vitin 2027.
Megjithatë, minuta e kufizuar në fushë dhe konkurrenca e fortë në repartin ofensiv kanë bërë që situata e tij të mos jetë aspak komode.
Burime pranë klubit raportojnë se trajneri aktual nuk e sheh Muçin si zgjedhje të parë në sulm, dhe për këtë arsye drejtuesit po shqyrtojnë mundësinë e një huazimi të tij në këtë fund merkatoje.
Një nga opsionet më konkrete është Kocaelispor, klubi i rikthyer këtë sezon në elitën e futbollit turk pas 16 vitesh mungesë.
Agjentët e tij kanë sugjeruar realisht një transferim drejt Kocaelisporit, duke parë qëndrimin e Besiktasit dhe dëshirën e vetë lojtarit për të pasur më shumë.
Merkatoja në Turqi mbyllet më 15 shtator, dhe javët në vijim pritet të jenë vendimtare për fatin e sulmuesit shqiptar.
