Më në fund po hapet rruga për trajnerët kosovarë, që zanatin ta ushtrojnë edhe jashtë vendit.
I fundit që ka marrë ftesë për të udhëhequr një skuadër jashtë Kosovës është ish-futbollisti i njohur vushtrrias, Besart Cecelia, të cilin nga sezoni i ardhshëm mund ta shohim në kampionatin e Turkmemistanit.
Është skuadra e Ligës së Parë FK Lebap që i ka bërë ofertë zyrtare Cecelisë, që nga sezoni i ardhshëm, nga 20 korriku, ta marrë drejtimin e skuadrës.
Kontrata është për një sezon, deri në Prill të vitit 2025, por me mundësi vazhdimi nëse klubi përfundon në mesin e tri skuadrave më të mira, në fund të sezonit.
Siç mëson Tëvë 1, Cecelia është duke e shqyrtuar seriozisht këtë ofertë, e cila atij i është mundësuar nga firma “Totik Group”, në krye me menaxherin e njohur turk Firat Totik.
Cecelia ka qenë së fundit trajner te Vllaznia e Pozheranit në Ligën e Parë, ndërsa aktualisht është pjesë e shkollës së futbollit “FC Elite” nga Prishtina.
Ai ka qenë trajner edhe te Trepça ‘89 sa ishte në Superligë, te Arbëria Dobrajë, si dhe ka udhëhequr ekipet e të rinjve te Trepça, Vushtrria dhe “El Clasico”.
