Kandidatja e PSD-së për kryetare të Prishtinës, Besa Shahini, e ka cilësuar arsimin si prioritetin kryesor të saj, duke e quajtur bazën e zhvillimit ekonomik dhe social të kryeqytetit dhe të Kosovës.
Ajo paralajmëroi investime të mëdha në infrastrukturën arsimore: ndërtimin e 10 shkollave të reja, 10 anekseve në shkolla ekzistuese, si dhe 30 çerdhe e kopshte, prej të cilave 20 pritet të themelohen brenda vitit të parë në hapësirat ekzistuese.
“Jemi vend i vogël dhe resursin e vetëm e kemi te njerëzit tanë. Nxënësit e Prishtinës sot janë katër deri në pesë vite mbrapa krahasuar me kryeqytetet tjera evropiane. Kjo nënkupton që mbetemi mbrapa edhe në tregun global të punës. Prioriteti ynë është që të gjithë fëmijët të mësojnë në një ndërrim dhe të kenë kushte të barabarta me bashkëmoshatarët e tyre në Evropë”, tha Shahini në emisionin “Info Nata” në Tëvë1.
Sa i përket kujdesit në fëmijërinë e hershme, ajo theksoi se çmimi i lartë i çerdheve private, deri në 400 euro, po detyron shumë nëna të heqin dorë nga puna.
Sipas saj, krijimi i çerdheve publike do të lehtësonte këtë barrë dhe do të ofronte mundësi të barabarta për të gjithë fëmijët.
“Sa i përket kujdesit në fëmijërinë e hershme – te çerdhet dhe kopshtet problemi është dyfish kur nuk kemi mjaftueshëm. Për shkak që çmimi i çerdheve është shumë i lartë deri në 400 euro, detyrohen që shumë nëna të qëndrojnë në shtëpi. Pra, plani jonë është i thjeshtë – 10 shkolla të reja, 10 anekse te shkollat ekzistuese dhe 30 çerdhe e kopshte që të themelohen menjëherë. Ndërtimi i shkollave merr më shumë kohë, por themelimi i çerdheve do të bëhet brenda vitit të parë shumë lehtë, pasi që 20 do t’i themelojmë në hapësirat ekzistuese. Bazuar në çmimet e sotme që po ndërtohen, një shkollë mund të kushtojë deri në 3 milionë euro”, u shpreh ajo.
