Njëri nga futbollistët ikonik të Kosovës dhe Besës së Pejës në veçanti, Haxhi Zeka është kthyer te klubi pejan, në një rol tjetër. Golashënuesi më i mirë i skuadrës për shumë vjet do të ndihmojë ekipin në rolin e trajnerit për grupmoshat e reja, së bashku edhe me ish-futbollistin tjetër pejan, Dukagjin Gashi, njëri nga mesfushorët kryesor të ekipit në kohën e lavdishme të Besës.
FC Besa Peja, e komunikoi lajmin përmes rrjeteve sociale për angazhimin e dy trajnerëve të rinj.
“FC Besa Peja njofton se, në vazhdimin e konsolidimit të akademisë, sot është arritur një marrëveshje për angazhimin e dy trajnerëve për grupmoshat U-17 dhe U-19.
Haxhi Zeka dhe Dukagjin Gashi do të jenë sërish së bashku, por tani në një rol të ri: në duart e tyre do të kalojnë djemtë e rinj të këtij qyteti, të cilët do të bëhen bartësit kryesorë të së ardhmes sonë.
Ky hap tregon përkushtimin tonë ndaj zhvillimit të talenteve lokal dhe është një garanci për një të ardhme të ndritur për klubin tonë”, shkruan në njoftimin e Besës.
Klubi i ri në futbollin vendor, por me emrin e skuadrës së njohur pejane, aktualisht po bën gara në Ligën e parë të futbollit.
