Profesori universitar, Dashamir Bërxulli, ka vlerësuar se ditët e para të fushatës zgjedhore janë karakterizuar nga një rënie e dukshme e tonit emocional, si pasojë e zhvillimeve politike të muajve të fundit dhe lodhjes së elektoratit.
Në emisionin “Këndi i Debatit” në Tëvë1, Bërxulli tha se fushata aktuale është ndikuar nga dy faktorë kryesorë: afërsia me zgjedhjet e kaluara dhe qëllimet strategjike të partive politike në këtë proces zgjedhor.
“Këto katër ditët e para të fushatës, por edhe ajo se çka i parapriu fushatës, janë kryqëzuar nga dy faktorë. E para, zgjedhjet e kaluara ishin jo më larg sesa në fillim të këtij viti, praktikisht 11 muaj më herët, dhe e dyta, qëllimi strategjik i partive politike në këto zgjedhje”, u shpreh Bërxulli.
Sipas tij, ndonëse bëhet fjalë për një fushatë që vjen pas zgjedhjeve të 9 shkurtit, klima emocionale është dukshëm më e zbehur, edhe për shkak të bllokadës institucionale që pasoi ato zgjedhje.
“Megjithëse kemi të bëjmë me një fushatë që vjen pas zgjedhjeve të 9 shkurtit, toni emocional i fushatës, natyrshëm duke iu referuar edhe bllokadës si pasojë e atyre zgjedhjeve, ka rënë në një masë të madhe”, tha ai.
Bërxulli theksoi se kjo situatë është rezultat i një shterimi emocional, jo vetëm te partitë politike, por veçanërisht te elektorati, i cili sipas tij ka dhënë sinjale të qarta.
“Ka një shterim emocional edhe nga ana e partive politike, por edhe nga ana e elektoratit dhe veçanërisht nga ky i fundit, i cili iu ka dhënë sinjale partive politike, përmes matjeve të opinionit publik, që nuk duron dot më këtë lloj diskursi përçarës dhe shfrytëzues emocional për vota”, përfundoi profesori universitar. /teve1.info/
