Opinionisti, Nikollë Berishaj vlerëson se deklaratat e ministrit të jashtëm serb, Ivica Daçiq se do të ketë reciprocitet për Malin e Zi pasi kjo e fundit votoi pro pranimit të aplikimit të Kosovës në Këshillin e Evropës nuk i rrezikon marrëdhëniet e Malit të Zi me Serbinë.
“Nuk e besoj sepse edhe Abazoviqi edhe kryetari i tashëm janë shumë të afërt me politikën e Vuçiqit kështu që shohim shumë deklarime edhe për Ballkanin e Hapur kështu siç është e jo ashtu siç do të duhej të ishte, me 6 shtete ku do të merrte pjesë edhe Kosova. Më shumë për mua më duken lojëra politike që i bëjnë për ta zhvendos vëmendjen e popullit prej një situate ku ata e dinë se s’kanë asgjë në dorë”, tha Berishaj.
Megjithatë, sipas tij vota pro e Malit të Zi më shumë ishte e ndikuar nga Bashkësia Ndërkombëtare.
“Me siguri ndikim ka pasur edhe ndikimi dhe mirëpritja që ia kanë bërë Abazoviqit në Kosovë. Me siguri ka pasë ndikim edhe takimi i para 2-3 javësh në Cetinjë ku mori pjesë edhe Kosova po sidoqoftë unë mendoj se kryesisht është ndikim i faktorit perëndimor”, ka thënë Berishaj në Ditari në Tëvë 1.
Sipas tij në Serbi ka ardhur një “garniturë proserbe” e cila e ka bërë Serbinë që të besojë se ata do të jenë në krah të tyre.
“Ardhja e një garniture të re proserbe në Mal të Zi e ka bërë Serbinë që të besojë që një votë e Malit të Zi gjithmonë do të jetë në krah të tyre, qoftë si pjesë e botës serbe që ata e propagojnë, decidivisht Daçiqi por qoftë edhe si bashkëvëllezër, edhe si bashkëkombas sipas fesë”, ka shtuar Berishaj.