Ish-deputeti i PDK-së, Hisen Berisha, ka deklaruar se rezultatet e Partisë Demokratike të Kosovës në zgjedhjet parlamentare të mbajtura më 28 dhjetor pritet të jenë pozitive. Sipas tij, kjo vjen si rezultat i një fushate intensive, e cila është përcjellë me përkrahje morale dhe demokratike.
Berisha këto deklarata i ka bërë në emisionin “Mesditë” në Tëvë1, ku ka theksuar se data 28 dhjetor përfaqëson integritetin politik dhe kombëtar të vendit.
Ai ka paralajmëruar gjithashtu se PDK dhe LDK duhet të tregojnë kujdes të shtuar për ta ruajtur Kosovën, duke përmendur rrezikun e humbjes së identitetit shtetëror.
I pyetur për kryetarin e ri të PDK-së, Bedri Hamza, Berisha ka vlerësuar se ai ka marrë drejtimin e partisë në një periudhë të ndjeshme.
“Pritjet janë pozitive, fushata ka qenë intensive ka qenë një pranim i mirë dhe përkrahje morale dhe demokratike. 28 dhjetori tregon integritetin tonë politik dhe kombëtar. Hamza ka ardhur në momentin kritik për Partinë Demokratike të Kosovës dhe ne e kemi vlerësuar lart tani edhe në të ardhmen. Kosova është në rrezik nga humbja e sovranitetit politik në territor, nga humbja e identitetit shtetëror, PDK dhe LDK duhet të bëjnë kujdes dhe ta ruajnë shtetin nga një tendencë e tillë që rrezikon edhe territoralisht edhe aspektin e sovranitetit politik”, ka deklaruar Berisha.
