Kuvendi i Kosovës po zhvillon një seancë të jashtëzakonshme të thirrur me kërkesë Grupit Parlamentar të AAK-së, për të diskutuar rreth çështjes së ushqimit të pjesëtarëve të FSK’së.
Deputeti i Aleancës për Ardhmërinë e Kosovës (AAK), Bekë Berisha, e ka quajtur situatë shqetësuese dhe alarmante mungesën e ushqimit në FSK.
Ai në emër të deputetëve ka kërkuar zgjidhje urgjente dhe të menjëhershme nga qeveria Kurti, pasi siç ka thënë ai ‘ nuk ka lojë me ushtri’.
“Situata aktuale është tepër shqetësuese Trajtimi i ushtarëve tonë me neglizhencë është një shkelje e rëndë e përgjegjësisë së udhëheqjes së kësaj qeverie. Kriza e furnizimit me produkte esenciale për FSK-në është një sinjal alarmant që kërkon zgjIdhje të menjëhershme. Sot kërkojmë një përgjigje të qartë nga qeveria. Sot kërkojmë zgjidhje të menjëhershme dhe urgjente. Një ushtarë nuk duhet të ketë shqetësim ushqimin, uniformën, mungesën e veshmbathjes. Nëse ju e quani veten qeveri këto gjëra nuk lejohen të ndodhin. Besa nuk ka ndodhë në asnjë qeveri më herët. Duhet me ngulm t’i përmbushni obligimet që ju i keni dhënë dhe jo të propagandoni ashtu si dini ju. Po ua përsëris nuk ka lojë me ushtri”, ka thënë ai.
Në këtë seancë të jashtëzakonshme nuk po merr pjesë Lëvizja Vetëvendosje.
Në një konferencë për media, deputeti i Vetëvendosjes, Enver Dugolli tha se Grupi Parlamentar i LVV-së nuk do të marr pjesë në asnjë seancë që ftohet nga opozita, ndërsa, deputeti i Lëvizjes Vetëvendosje, Mefail Bajqinovci, ka thënë se kjo është propagandë, e shpifje./teve1.info/
Vetëvendosje nuk merr pjesë në seancën e jashtëzakonshme për ushqimin e ushtarëve të FSK-së
