Gjykata Themelore më 12 prill të këtij viti ka refuzuar pretendimet e ministrit të Administrimit dhe Pushtetit Lokal, Elbert Krasniqi, i cili pretendonte se emërimi i Suad Ademit në pozitën e nënkryetarit të komunës së Fushë-Kosovës, ishte joligjor.
Kryetari i Partisë Liberale Egjiptiane, Veton Berisha, thotë se ministri Krasniqi këtë situatë e krijoi për hakmarrje politike e shkaqe personale.
“Ne themi që është hakmarrje politike, për inate politike, në këtë mënyrë ai ka kaluar edhe Kushtetutën edhe ligjin. Për ne është humbje jashtëzakonisht e madhe, e kjo për shkak të një inati politik e personal që ka ministri Krasniqi. Krasniqi ka keqpërdorur autoritetin e tij publik. Kjo qasje në mënyrë arbitrare e ministrit ndaj këtij vendimi, është vendim tepër i rëndë për ne. Përkundrazi, Krasniqi do duhej të ofronte bashkëpunim, të ofronte projekte e mbështetje. Që 14 muaj kemi mbetur pezull pa një person që ushtron këtë detyrë. Ne jemi duke pritur ende vendimin e Gjykatës”, deklaroi Berisha në emisionin “Ditari”.
Njëherit, Berisha tha se ministri Krasniqi ka vazhduar të pengojë këtë proces duke ngritur padi ndaj vendimit të Kuvendit Komunal në Gjykatën Themelore, e një gjë të tillë, Berisha e vlerësoi si luftë të egër e të padrejtë ndaj tyre.
“Me kryetarin e Komunës kemi arritur që në shkurt të vitit 2022, propozimi për nënkryetarin të kalojë në Asamblenë komunale. Komuna e Fushë-Kosovës, bazuar në mandatin e saj, e ka për detyrë t’ia bartë Ministrisë së Administrimit të Pushtetit Lokal secilin vendim që e merr. Fatkeqësisht, ne e kemi pasur fatin që ministri i asaj ministrie, të jetë njëri nga kundërshtarët tanë politik, e që ka qenë po në ato zgjedhje. Fati jonë i keq ka qenë që Elbert Krasniqi, të jetë ministër i asaj ministrie dhe në momentin që ka shkuar lënda për interpretim, kanë filluar luftën e tyre të padrejtë dhe luftën e egër në raport me vendimin e marrë për ne. Kanë kërkuar menjëherë që të anulohet vendimi dhe janë bazuar në udhëzimin administrativ, udhëzim i nxjerrur në mospërputhje me vetëqeverisje lokale dhe Kushtetutën. Është në mospërputhje sepse është nxjerrë nga vetë Ministria me qëllim që t’i koordinojnë sipas interesave të tyre ditore”, theksoi tutje Berisha në Tëvë1.
Berisha deklaroi se edhe avokati i popullit i është drejtuar Ministrisë për ta korrigjuar atë udhëzim administrativ. Mirëpo, ky i fundit thotë se i njëjti ka vazhduar të jetë ende në fuqi.
“Komuna e Fushë-Kosovës duke qenë e vetëdijshme se ka vepruar drejtë, nuk ka pranuar ta anulojë atë vendim”, tha Berisha./teve1.info/.
