Ish-zëvendësministri i Punëve të Jashtme i Kosovës, Anton Berisha, tha se kryeministri, Albin Kurti, ka filluar të ketë urrejtje ndaj Shqipërisë dhe politikanëve atje pas zgjedhjeve të fundit në shtetin shqiptar, kur e ka parë që i ka dështuar ëndrra për me qenë i pari i krejt shqiptarëve.
Sipas Berishës, Kurti më nuk ka ambicie për të pasur raporte të mira me Shqipërinë.
“Albin Kurti me ëndrrën e tij që me qenë përfaqësues i të gjithë shqiptarëve është dëshpëruar në zgjedhjet e Shqipërisë, dhe aty ka filluar urrejtja e Kurtit ndaj Shqipërisë dhe politikanëve, sepse rezultati i papërfillshëm ka filluar prej atij momenti distancimi, sepse e ka parë që ëndrra e tij me qenë i pari i krejt shqiptarëve në Shqipëri ai ka dështuar dhe i ka rënë ambicia për me pas raporte të mira”, tha ai në emisionin “Këndi i Debatit” në Tëvë1.
Kurti ka refuzuar takimin me Ramën, pasi ky i fundit ka anuluar mbledhjen e përbashkët të dy qeverive të paraparë për muajin qershor.
Rama ndodhet në Prishtinë, në turin e tij në vendet e rajonit për përgatitjet rreth Samitit të Procesit të Berlinit, i cili do të organizohet në muajin tetor në Tiranë.
