Deputeti i Partisë Demokratike të Kosovës, Hysen Berisha, ka theksuar se partitë opozitare nuk do t’i lejojnë vetes të hyjnë në qeverisje me një parti që nuk ka një program të qartë.
Ai ka deklaruar se Lëvizja Vetëvendosje ka vetëm një opsion për të formuar Qeverinë, dhe ai është me grupet e pakicave, përfshirë Listën Serbe.
“Albin Kurti është i pari që ka të drejtën ta formojë Qeverinë mirëpo fakti se komplet partitë opozitare janë në bllok dhe nuk ja lejojnë vetës të jenë pjesë e një ambicie politike të një partie të cilës s’ka fare program qeverisës, që krejt fushatën e ka zhvilluar përmes fyerjes…Kjo parti e ka të vetëm alternative që ta bëjë Qeverinë me grupin e pakicave dhe Listën Serbe, të cilët ashtu duhet të jenë pjesë e çdo Qeverie se janë pakica kombëtare“, ka deklaruar ai në emisionin “Info Nata“ në Tëvë1.
Në lidhje me mundësinë e krijimit të një Qeverie nga partitë opozitare, Berisha ka theksuar se nuk do të ishte e drejtë që LDK të kërkojë postin e kryeministrit, pasi kjo, sipas tij, i takon partisë që ka më shumë vota.
“Ajo parti që nëse ka edhe një votë më shumë duhet që ta bëjë Qeverinë, ta ketë kryeministrin. Pra në këtë rast po flasim për partitë e opozitës, ku PDK ka një diferencë në vota diku 5 për qind me duket dhe do të ishte fer edhe nga LDK-ja që të mos këmbëngul për postin e kryeministrit… Nëse LDK e cila nuk është para PDK-së e bllokon krijimin e Qeverisë, atëherë edhe kjo dëshmon se është për pushtetin, për karrigen e jo për shtetin“, ka thënë ai.
