Kreu i Partisë Demokratike, Sali Berisha në një deklaratë për mediat pas mbledhjes së Kryesisë ka bërë të ditur se aktori, Florjan Binaj është kandidati i opozitës përballë Orgerta Manastirliut në zgjedhjet lokale të 9 nëntorit në Tiranë.
Berisha shprehu vlerësimet për të gjitha kandidaturat e ardhura nga personalitete të pavarura nga fusha të ndryshme, nga Shqipëria dhe nga diaspora, ndërsa theksoi se kandidatura e PD do diskutohet edhe me aleatët.
“Kandidaturat e ardhura, tashmë të bëra publike, për të cilat unë kam vlerësimin më të madh, janë realisht kandidatura të personaliteteve të pavarura nga fusha të ndryshme, nga Shqipëria dhe nga diaspora. Partia Demokratike, duke falënderuar me mirënjohje secilin prej atyre që vendosi të paraqesë kandidaturën e tij në shërbim të qytetarëve të Tiranës dhe përballjes me të keqen që përfaqëson Edi Rama, informon se do t’u paraqesë aleatëve tanë mendimin dhe sugjerimin që të mbështesim së bashku artistin e mirënjohur, personalitetin e shquar të artit, luftëtarin e paepur të kauzave të qytetarëve shqiptarë, komunikatorin e talentuar, e lindur, zotin Florjan Binaj”, tha Berisha, raporton Euronews Albania.
Berisha u shpreh se nëse merr miratimin nga aleatët, PD është e gatshme të angazhojë të gjitha potencialet në shërbim të kandidatit dhe fitores së tij në zgjedhjet e pjesshme.
“Asnjë hap nuk mund të ndërmerret pa kandidatin dhe do jetë kandidati, në qoftë se kemi rënë dakord për një kandidat të pavarur, kjo nuk do thotë se ne do i diktojmë atij. Do jetë ai që do gjejë ndihmën që kërkon nga forca jonë politike dhe forcat e tjera politike. Jemi të gatshëm të angazhojmë, pas rënies dakord me forcat e tjera politike, të gjitha potencialet tona që kandidati e gjykon se i shërbejnë fitores së tij”, tha Berisha.
Florjan Binaj shpalli një ditë më parë kandidaturën si kandidat i pavarur për Bashkinë e Tiranës.
Partia Socialiste e ka zyrtarizuar më 11 shtator kandidaturën e Ogerta Manastirliut për kryebashkiake të Tiranës. Edhe Partia “Lëvizja Bashkë” ka propozuar kryetarin e saj, Arlind Qori, për zgjedhjet e pjesshme në Tiranë.
Zgjedhjet e 9 nëntorit do të mbahen në gjashtë bashki: Tiranë, Vlorë, Berat, Mat, Tepelenë dhe Cërrik. Fushata zgjedhore do të nisë më 1 nëntor, ndërsa afati për regjistrimin e partive politike si subjekte zgjedhore përfundon më 11 tetor.
