Bekë Berisha ka deklaruar se nuk do të largohet nga Sigal Prishtina për momentin, por ka pranuar se është shumë e vështirë ta ushtrojë funksionin e kryetarit të klubit për shkak të angazhimeve të tij politike dhe situatës pas zgjedhjes së tij të fundit.
Ai tha se pas takimit me përfaqësues të tifogrupit “Plisat” dhe drejtuesve të klubit do të propozohet një ushtrues detyre i kryetarit, në bashkëpunim me tifozët dhe dashamirët e basketbollit, që të vijojë puna normale e klubit.
Sipas Berishës, ky hap do të ndihmojë që të qetësohen tensionet dhe të përqendrohet klubi tek rezultatet sportive. Vendimi vjen në një kohë kur zgjedhja e Berishës si kryetar i Sigal Prishtinës ka shkaktuar reagime të forta nga tifogrupi “Plisat” dhe konflikte të brendshme në klub, ndërsa Ministria e Kulturës, Rinisë dhe Sportit ka sugjeruar se ai duhet të zgjedhë mes detyrës në klub dhe statusit të tij si deputet, për të shmangur konfliktin e interesit.
Ministria e Kulturës, Rinisë dhe Sportit kishte reaguar lidhur me zgjedhjen e Bekë Berishës në një pozitë udhëheqëse të KB “Sigal Prishtina”, duke rikujtuar detyrimet ligjore që burojnë nga Ligji për Parandalimin e Konfliktit të Interesit. MKRS ka theksuar se Berisha është deputet i zgjedhur i Kuvendit të Kosovës dhe se pas betimit duhet të ndërmarrë veprime konkrete për të shmangur çdo konflikt të interesit brenda afateve ligjore.
EKSKLUZIVE: Bekë Berisha jep dorëheqje nga posti i kryetarit të KB Prishtina
