Hisen Berisha, kandidat për deputet nga radhët e PDK-së e ka vlerësuar të rrezikshme deklaratën e kryeministrit Kurti, i cili tha se opozita aktuale miqësinë me partnerët e kanë përdorë për ambalazhim të “hajnisë e të tradhtisë”.
Berisha ka thënë se sipas kësaj deklarate i bije që çdo partneritet me ndërkombëtarët kanë qenë në emër të korrupsionit.
Ai në emisionin “Këndi i Debatit” në Tëvë1 ka thënë se me një deklaratë të tillë janë rrezikuar raportet me partnerët.
“Kjo është thënia më e rrezikshme që e dëmton më së shumti dhe i fyen më së shumti partnerët ndërkombëtarë. Kjo po i bije që çdo partneritet i yni me ndërkombëtar paska qenë në emër të krimit të organizuar, korrupsionit të tjera. Kjo ka qenë thënia më banale që ka mundur me i rëndu raportet me partnerët që edhe ashtu janë të rënduara”, tha Berisha.
Kryeministri Kurti në një takim elektoral tha se ata aleancën me perëndimin e përdorin për ta forcuar ushtrinë.
“Aleanca me perëndimin, miqësia përdoret për ta forcuar ushtrinë e kurrë për ambalazhuar hajninë apo tradhtinë siç bën ata që dikur ishin në pushtet…”, kishte thënë Kurti.
